ദുബായ് : യുഎഇയിലെ യുവ മാധ്യമപ്രവർത്തകർക്കും വിദ്യാർത്ഥികൾക്കുമായി പുതിയ ‘മീഡിയ ആൻഡ് ഡിപ്ലോമസി കപ്പാസിറ്റി ബിൽഡിംഗ് പ്രോഗ്രാം’ പ്രഖ്യാപിച്ച് ദുബായ് മീഡിയ യൂത്ത് കൗൺസിലും അൻവർ ഗർഗാഷ് ഡിപ്ലോമാറ്റിക് അക്കാദമിയും (AGDA). അന്താരാഷ്ട്ര തലത്തിൽ രാജ്യത്തെ പ്രതിനിധീകരിക്കാൻ കെൽപ്പുള്ള യുവ എമിറാത്തി പ്രതിഭകളെ വാർത്തെടുക്കുകയാണ് ഈ സംയുക്ത സംരംഭത്തിന്റെ ലക്ഷ്യം.
2026 ജൂൺ 29 മുതൽ ജൂലൈ 8 വരെ ദുബായ് മീഡിയ ആസ്ഥാനത്തും അബുദാബിയിലെ അൻവർ ഗർഗാഷ് അക്കാദമിയിലുമായിട്ടാണ് കോഴ്‌സ് നടക്കുക. 18-നും 35-നും ഇടയിൽ പ്രായമുള്ള, മാധ്യമരംഗത്തും നയതന്ത്രരംഗത്തും താൽപ്പര്യമുള്ള യുഎഇ സ്വദേശികളായ സർവ്വകലാശാല വിദ്യാർത്ഥികൾക്കും ബിരുദധാരികൾക്കുമാണ് അവസരം. യുഎഇയുടെ വിദേശനയം, കമ്മ്യൂണിക്കേഷൻ സ്കിൽസ്, പബ്ലിക് സ്പീക്കിംഗ്, സോഫ്റ്റ് പവർ, മീഡിയ ക്രൈസിസ് മാനേജ്‌മെന്റ് തുടങ്ങിയ വിവിധ വിഷയങ്ങളിൽ പ്രമുഖ അന്താരാഷ്ട്ര വിദഗ്ദ്ധർ നയിക്കുന്ന ശിൽപ്പശാലകളും പ്രായോഗിക പരിശീലനവും ഇതിന്റെ ഭാഗമായി ലഭിക്കും. താല്പര്യമുള്ളവർക്ക് 2026 ജൂൺ 21 വരെ അപേക്ഷിക്കാം. അറബിക്, ഇംഗ്ലീഷ് ഭാഷകളിൽ പ്രാവീണ്യം നിർബന്ധമാണ്. സ്വദേശി യുവാക്കളെ അന്താരാഷ്ട്ര തലത്തിൽ രാജ്യത്തിന്റെ അഭിമാനസ്തംഭങ്ങളാക്കി മാറ്റാൻ ഈ പദ്ധതി സഹായിക്കുമെന്ന് ദുബായ് മീഡിയ എച്ച്.ആർ സെക്ടർ സിഇഓ ശൈഖ അഹമ്മദും, എജിഡിഎ ഡെപ്യൂട്ടി ഡയറക്ടർ ജനറൽ ഡോ. മുഹമ്മദ് ഇബ്രാഹിം അൽ ദാഹേരിയും വ്യക്തമാക്കി..