ഷാർജ : ഖോർഫക്കാനിലെ അൽ ലുലുയ്യ ബീച്ചിലുള്ള (Al Luluyah Beach) പതിനഞ്ചാം നൂറ്റാണ്ടിലെ പുരാവസ്തു പ്രദേശം നവീകരിക്കുന്നതിനായി 80 ലക്ഷം ദിർഹത്തിന്റെ പൈതൃക പദ്ധതിക്ക് ഉത്തരവിട്ട് ഷാർജ ഭരണാധികാരി ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി. ആറുമാസത്തിനകം പൂർത്തിയാക്കാൻ ലക്ഷ്യമിടുന്ന ഈ പദ്ധതിയുടെ ഭാഗമായി ചരിത്രപ്രസിദ്ധമായ ഈ പ്രദേശത്ത് ഒരു പുതിയ പൈതൃക വിപണിയും (Heritage Market) നിർമ്മിക്കും.
പഴയകാല പാരമ്പര്യം നിലനിർത്തിക്കൊണ്ട് നിർമ്മിക്കുന്ന വിപണിയിൽ പരമ്പരാഗത ശൈലിയിലുള്ള 20 കടകൾ, റെസ്റ്റോറന്റുകൾ, കഫേകൾ, സന്ദർശകർക്കുള്ള ഇരിപ്പിടങ്ങൾ, തണൽ നിറഞ്ഞ നടപ്പാതകൾ എന്നിവ ഉണ്ടായിരിക്കുമെന്ന് ഷാർജ ഇൻസ്റ്റിറ്റ്യൂട്ട് ഫോർ ഹെറിറ്റേജ് ചെയർമാൻ ഡോ. അബ്ദുൽ അസീസ് അൽ മുസല്ലം അറിയിച്ചു. കടൽ അഭിമുഖമായും ചരിത്ര അവശിഷ്ടങ്ങൾ കാണാൻ സാധിക്കുന്ന രീതിയിലുമായിരിക്കും ഇതിന്റെ രൂപകൽപ്പന. ഇതോടൊപ്പം കൽബ, ദിബ്ബ അൽ ഹിസ്ൻ തുടങ്ങിയ കിഴക്കൻ മേഖലകളിലും കൂടുതൽ പൈതൃക ഗ്രാമങ്ങളും മ്യൂസിയങ്ങളും നവീകരിക്കാൻ പദ്ധതിയുണ്ടെന്നും അദ്ദേഹം വ്യക്തമാക്കി.