ഗസ്സ : ഗസ്സ മുനമ്പിലെ പ്രതിസന്ധികൾക്കിടയിലും വിശുദ്ധ ഖുർആൻ മനഃപാഠമാക്കിയ 600 കുട്ടികളെ ആദരിച്ച് യുഎഇയുടെ മാനുഷിക സഹായ പദ്ധതിയായ ‘ഓപ്പറേഷൻ ചിവൽറസ് നൈറ്റ് 3’ (Operation Chivalrous Knight 3). കുട്ടികളുടെ വിദ്യാഭ്യാസപരവും മതപരവുമായ മുന്നേറ്റത്തെ പ്രോത്സാഹിപ്പിക്കുന്നതിനും, അടിയന്തര സാഹചര്യങ്ങളിൽ അവരുടെ മൂല്യങ്ങളും പ്രതീക്ഷകളും കാത്തുസൂക്ഷിക്കുന്നതിനുമായി സംഘടിപ്പിച്ച പ്രത്യേക ചടങ്ങിലാണ് കുരുന്നുകളെ ആദരിച്ചത്.
വിവിധ ഖുർആനിക സംരംഭങ്ങളുടെയും മതകാര്യ മന്ത്രാലയത്തിന്റെയും പ്രതിനിധികളും ആയിരക്കണക്കിന് രക്ഷിതാക്കളും പങ്കെടുത്ത ചടങ്ങിൽ കുട്ടികളുടെ ഖുർആൻ പാരായണവും ആത്മീയ ഗാനാലാപനങ്ങളും അരങ്ങേറി. ചടങ്ങിന്റെ സമാപനത്തിൽ, ഖുർആൻ പഠനത്തിൽ കൂടുതൽ മികവ് പുലർത്താനും വിദ്യാഭ്യാസം തടസ്സമില്ലാതെ തുടരാനും പ്രോത്സാഹിപ്പിക്കുന്നതിനായി യുഎഇ നൽകിയ ഉപഹാരങ്ങളും സാമ്പത്തിക സഹായങ്ങളും സമ്മാനിച്ചു.