യുഎഇ പ്രസിഡന്റ് ഷെയ്ഖ് മുഹമ്മദ് ജർമ്മൻ മുൻ ചാൻസലർ ആംഗല മർക്കലുമായി കൂടിക്കാഴ്ച നടത്തി

ബെർലിൻ : ജർമ്മനി സന്ദർശനത്തിനിടെ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ ജർമ്മനിയുടെ മുൻ ചാൻസലർ ആംഗല മർക്കലുമായി കൂടിക്കാഴ്ച നടത്തി. ഭരണകാലത്ത് യുഎഇ-ജർമ്മനി ഉഭയകക്ഷി ബന്ധം ശക്തമാക്കുന്നതിലും ഇരുരാജ്യങ്ങളും തമ്മിലുള്ള സാമ്പത്തിക സഹകരണം വിപുലീകരിക്കുന്നതിലും ആംഗല മർക്കൽ വഹിച്ച സുപ്രധാന പങ്കിനെ യുഎഇ പ്രസിഡന്റ് പ്രശംസിച്ചു. അവർക്ക് നന്മയും ആരോഗ്യവും നേർന്ന അദ്ദേഹം, സൗഹൃദബന്ധം തുടരുന്നതിൽ സന്തോഷം പങ്കുവെച്ചു.
യുഎഇ പ്രസിഡന്റിന്റെ സന്ദർശനത്തിനും ആശംസകൾക്കും നന്ദി അറിയിച്ച ആംഗല മർക്കൽ, യുഎഇയുടെയും ജനങ്ങളുടെയും ഭാവി വളർച്ചയ്ക്കും പുരോഗതിക്കും ആശംസകൾ നേർന്നു. ഇരുരാജ്യങ്ങളും തമ്മിലുള്ള സൗഹൃദബന്ധം വരുംനാളുകളിലും കൂടുതൽ കരുത്താർജ്ജിക്കട്ടെയെന്നും അവർ കൂട്ടിച്ചേർത്തു. യുഎഇ വ്യവസായ അഡ്വാൻസ്ഡ് ടെക്നോളജി മന്ത്രി ഡോ. സുൽത്താൻ അഹമ്മദ് അൽ ജാബറും കൂടിക്കാഴ്ചയിൽ പങ്കെടുത്തു.