പാസ്പോർട്ട് സേവനങ്ങൾ: പുതിയ ടെൻഡർ ക്ഷണിച്ച് ഇന്ത്യൻ എംബസി

അബുദാബി : യു.എഇയിലെ ഇന്ത്യൻ എംബസിയിലും ദുബായിലെ ഇന്ത്യൻ കോൺസുലേറ്റിലുമുള്ള കോൺസുലാർ, പാസ്പോർട്ട്, വിസ (CPV) സേവനങ്ങൾ ഔട്ട്സോഴ്സ് ചെയ്യുന്നതിനായി പുതിയ ലേലം (RFP) ക്ഷണിച്ചു. ഇതുസംബന്ധിച്ച് തിങ്കളാഴ്ച ഇന്ത്യൻ എംബസി പുതിയ ടെൻഡർ പുറത്തിറക്കിയതായി  റിപ്പോർട്ട് ചെയ്തു.

സെപ്റ്റംബർ 28, 2026 തീയതി രേഖപ്പെടുത്തിയ ‘Abu/Cons/415/08/2026’ എന്ന നമ്പറിലുള്ള പുതിയ ടെൻഡർ, നിലവിൽ അൽഹിന്ദ് ഗ്ലോബൽ സർവീസസ് നടത്തുന്ന ഇന്ത്യൻ കോൺസുലാർ അപ്ലിക്കേഷൻ സെന്ററുകളുടെ (ICACs) മുൻ നടപടികൾ കോടതി ഉത്തരവിനെ തുടർന്ന് പുനഃക്രമീകരിച്ചതിന്റെ ഭാഗമായാണ്. ബിഡ് ചെയ്യുന്ന കമ്പനികൾ ഒക്ടോബർ 4-നകം തങ്ങളുടെ ഓർഗനൈസേഷൻ പ്രൊഫൈൽ സമർപ്പിക്കേണ്ടതാണ്. ഒക്ടോബർ 8-ന് പ്രീ-ബിഡ് കോൺഫറൻസും, ഒക്ടോബർ 26-ന് ഉച്ചയ്ക്ക് 3 മണിക്ക് ബിഡ് സമർപ്പിക്കാനുള്ള അവസാന തീയതിയും നിശ്ചയിച്ചിട്ടുണ്ട്. നവംബർ 27-ന് കരാർ കൈമാറാനാണ് ലക്ഷ്യമിടുന്നത്.