അബുദാബി : നേപ്പാളിലുണ്ടായ പ്രളയത്തിൽ കാണാതായ 10 പേരെക്കൂടി യുഎഇ തിരച്ചിൽ-രക്ഷാസേന കണ്ടെത്തി. ഇതോടെ നേപ്പാളിൽ ദൗത്യം ആരംഭിച്ചതിനുശേഷം യുഎഇ സംഘം കണ്ടെത്തിയ ആകെ ആളുകളുടെ എണ്ണം 18 ആയി ഉയർന്നു. നേപ്പാളിലെ ദുരന്തനിവാരണ സേനയുമായി ചേർന്ന് പ്രളയബാധിത മേഖലകളിൽ തിരച്ചിൽ ശക്തമായി തുടരുന്നതിനിടെയാണ് ഈ നേട്ടം.
രസുവ, ത്രിശൂലി നദീതീരങ്ങൾ, സമീപ പ്രദേശങ്ങൾ എന്നിവിടങ്ങളിലാണ് പ്രധാനമായും തിരച്ചിൽ പുരോഗമിക്കുന്നത്. ഡ്രോണുകൾ, ത്രീഡി മാപ്പിംഗ്, ഏരിയൽ സർവേകൾ തുടങ്ങിയ അത്യാധുനിക സാങ്കേതികവിദ്യകളും ഉപകരണങ്ങളും ഉപയോഗിച്ചാണ് സംഘം കാണാതായവർക്കായുള്ള തിരച്ചിൽ വേഗത്തിലാക്കുന്നത്.
ഇതിനിടെ യുഎഇയുടെ അഞ്ചാമത്തെ ജീവകാരുണ്യ സഹായ വിമാനവും നേപ്പാളിൽ എത്തിച്ചേർന്നു. രക്ഷാപ്രവർത്തനങ്ങൾക്ക് ആവശ്യമായ ബോട്ടുകൾ, ഡ്രോണുകൾ, പവർ ഉപകരണങ്ങൾ, മറ്റ് സാങ്കേതിക-ലൊജിസ്റ്റിക്സ് സാമഗ്രികൾ എന്നിവയാണ് ഈ വിമാനത്തിൽ എത്തിച്ചത്. ഇവ നേപ്പാളി രക്ഷാസേനയ്ക്ക് കൈമാറും. ദുരന്ത സമയങ്ങളിൽ മറ്റ് രാജ്യങ്ങളെ സഹായിക്കുന്ന യുഎഇയുടെ പ്രതിജ്ഞാബദ്ധതയാണ് ഈ ദൗത്യത്തിലൂടെ വ്യക്തമാകുന്നതെന്ന് യുഎഇ റിലീഫ് ഓപ്പറേഷൻസ് ഡയറക്ടർ ഹമൂദ് അൽ അഫാരി വ്യക്തമാക്കി.
34