12
അബുദാബി : ചൊവ്വാഴ്ച രാവിലെ അബുദാബിയുടെ വിവിധ ഭാഗങ്ങളിൽ മൂടൽമഞ്ഞ് അനുഭവപ്പെടുകയും കാഴ്ചാ പരിമിതി കുറയുകയും ചെയ്തതിനെ തുടർന്ന് ഡ്രൈവർമാർക്ക് ജാഗ്രതാ നിർദ്ദേശം നൽകി. രാവിലെ 9 മണിവരെ കാലാവസ്ഥ നിരീക്ഷണ കേന്ദ്രം മൂടൽമഞ്ഞ് ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
സുരക്ഷ മുൻനിർത്തി അബുദാബി പൊലീസ് പ്രധാന റോഡുകളിലെ വേഗത പരിധി മണിക്കൂറിൽ 80 കിലോമീറ്ററായി കുറച്ചു. സ്വെയ്ഹാൻ റോഡ് (അൽ ഹയർ റൗണ്ട് എബൗട്ട് മുതൽ നഹൽ റൗണ്ട് എബൗട്ട് വരെ), ഷെയ്ഖ് തഹ്നൂൻ ബിൻ മുഹമ്മദ് അൽ നഹ്്യാൻ റോഡ് (മസക്കൻ മുതൽ അൽ ഹയർ വരെ), നഹൽ റോഡ് (നഹൽ മുതൽ ബിദ് ബിൻത് സൗദ് വരെ) എന്നിവിടങ്ങളിലാണ് വേഗത പരിധി കുറച്ചത്.
മൂടൽമഞ്ഞ് കാരണം കാഴ്ചാ പരിമിതി കുറഞ്ഞതിനാൽ വാഹനയാത്രക്കാർ അതീവ ജാഗ്രത പാലിക്കണമെന്ന് അധികൃതർ അഭ്യർത്ഥിച്ചു. ഇലക്ട്രോണിക് ബോർഡുകളിൽ കാണിക്കുന്ന പുതിയ വേഗത പരിധികൾ ഡ്രൈവർമാർ കർശനമായി പാലിക്കണം. താത്കാലികമായി നിശ്ചയിച്ച വേഗത പരിധി ലംഘിച്ചാൽ റഡാർ വഴി പിഴ ഈടാക്കുന്നതായിരിക്കും. മുന്നിലുള്ള വാഹനവുമായി സുരക്ഷിത അകലം പാലിക്കുക, ലോ-ബീം ഹെഡ്‌ലൈറ്റുകൾ ഉപയോഗിക്കുക, പെട്ടെന്ന് ലെൻ്റ് മാറ്റാതിരിക്കുക തുടങ്ങിയ നിർദ്ദേശങ്ങളും പൊലീസ് നൽകിയിട്ടുണ്ട്.