26
ദുബായ് : ഈ വർഷം മേഖലയിലുണ്ടായ സംഘർഷങ്ങൾക്കിടെ ദുബായ് വിമാനത്താവളങ്ങൾ 111 സുരക്ഷാ മുന്നറിയിപ്പുകളും 17 മിസൈലാക്രമണങ്ങളും നേരിട്ടതായി ദുബായ് എയർപോർട്ട്സ് സിഇഒ പോൾ ഗ്രിഫിത്സ് വെളിപ്പെടുത്തി. ദുബായ് മീഡിയ ഓഫീസിന്റെ ആഭിമുഖ്യത്തിൽ വ്യാഴാഴ്ച നടന്ന പ്രത്യേക മാധ്യമ സമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്. ആക്രമണങ്ങളിൽ വിമാനത്താവളങ്ങൾക്ക് നേരിയ കേടുപാടുകൾ മാത്രമാണ് സംഭവിച്ചതെന്നും ഏറ്റവും ആശ്വാസകരമായ കാര്യം ഒരൊറ്റ ആളപായം പോലും ഉണ്ടായില്ല എന്നതാണെന്നും അദ്ദേഹം പറഞ്ഞു. വളരെ കുറച്ചുപേർക്ക് മാത്രമാണ് പരിക്കേറ്റതെന്നും അവരെല്ലാം പൂർണ്ണമായി സുഖം പ്രാപിച്ചുവെന്നും അദ്ദേഹം കൂട്ടിച്ചേർത്തു.
ബാലിസ്റ്റിക് മിസൈൽ ആക്രമണങ്ങളെ എങ്ങനെ നേരിടണം എന്നതിനെക്കുറിച്ച് യാതൊരുവിധ മുൻപരിചയവും ആർക്കും ഉണ്ടായിരുന്നില്ലെന്നും എന്നാൽ മണിക്കൂറുകൾക്കകം ഇത്തരം പ്രതിസന്ധികളെ ഫലപ്രദമായി കൈകാര്യം ചെയ്യാൻ ഉദ്യോഗസ്ഥർക്ക് സാധിച്ചുവെന്നും അദ്ദേഹം ചൂണ്ടിക്കാട്ടി. അസാധാരണമായ ഈ സുരക്ഷാ ഭീഷണികളെയും തടസ്സങ്ങളെയും മറികടന്ന് ദുബായുടെ വ്യോമയാന മേഖല കാണിച്ച അസാമാന്യമായ അതിജീവനത്തിന്റെ തെളിവാണ് ഈ കണക്കുകൾ. പ്രതിസന്ധി ഘട്ടത്തിൽ നിന്ന് അതിവേഗം സാധാരണ പ്രവർത്തന നിലയിലേക്ക് മടങ്ങാനും ലക്ഷക്കണക്കിന് യാത്രക്കാരുടെ സുരക്ഷ ഉറപ്പാക്കാനും ദുബായ് വിമാനത്താവളങ്ങൾക്ക് സാധിച്ചുവെന്നും അദ്ദേഹം വ്യക്തമാക്കി.