ജിസിസിയിൽ വൻ ക്രെഡിറ്റ് കാർഡ് തട്ടിപ്പ് സംഘം പിടിയിൽ

ദുബായ് : ട്രാഫിക് പിഴകളും യുട്ടിലിറ്റി ബില്ലുകളും 50 മുതൽ 80 ശതമാനം വരെ കിഴിവിൽ അടച്ചുനൽകാമെന്ന വ്യാജ ഓഫറുകൾ നൽകി ജിസിസി രാജ്യങ്ങളിൽ വൻ സാമ്പത്തിക തട്ടിപ്പ് നടക്കുന്നതായി അന്താരാഷ്ട്ര സൈബർ സെക്യൂരിറ്റി സ്ഥാപനമായ ‘ഗ്രൂപ്പ്-ഐബി’യുടെ (Group-IB) മുന്നറിയിപ്പ്. മോഷ്ടിച്ച ക്രെഡിറ്റ് കാർഡ് വിവരങ്ങൾ ഉപയോഗിച്ച് ഔദ്യോഗിക സർക്കാർ പോർട്ടലുകൾ വഴി യഥാർത്ഥ ബില്ലുകൾ അടച്ച്, പകരം ബിൽ ഉടമകളിൽ നിന്ന് ക്രിപ്‌റ്റോകറൻസി വഴിയോ ലോക്കൽ ബാങ്ക് ട്രാൻസ്ഫർ വഴിയോ പണം തട്ടിയെടുക്കുന്ന ശൃംഖലയെയാണ് സൈബർ വിദഗ്ദ്ധർ കണ്ടെത്തിയത്.
വ്യാജ വെബ്‌സൈറ്റുകൾ നിർമ്മിച്ച് ഇ-സിം (eSIM) ഹാക്കിംഗിലൂടെ ഉപഭോക്താക്കളുടെ ബാങ്കിംഗ് വിവരങ്ങളും ഒടിപിയും ചോർത്തിയാണ് തട്ടിപ്പുകാർ പണം തട്ടുന്നത്. നേരിട്ട് സർക്കാർ പോർട്ടലുകളിലേക്ക് പണം അടയ്ക്കപ്പെടുന്നതിനാൽ ബാങ്കുകളുടെ സെക്യൂരിറ്റി സംവിധാനങ്ങൾക്ക് തുടക്കത്തിൽ ഇത് കണ്ടെത്താൻ സാധിക്കാറില്ല. കേവലം 80 കാർഡുകളിൽ നിന്നായി 74 ലക്ഷം ദിർഹത്തിന്റെ (2.01 മില്യൺ ഡോളർ) നഷ്ടം സ്ഥിരീകരിച്ചിട്ടുണ്ട്. വ്യാജ ഡിസ്കൗണ്ട് ഓഫറുകളിൽ വീഴരുതെന്നും, മൂന്നാം കക്ഷി ആപ്പുകൾക്ക് പകരം ഔദ്യോഗിക സർക്കാർ വെബ്‌സൈറ്റുകളും ആപ്പുകളും മാത്രം ഉപയോഗിക്കണമെന്നും യുഎഇ സൈബർ സെക്യൂരിറ്റി കൗൺസിൽ മുന്നറിയിപ്പ് നൽകി.