അൽ സഫ സ്ട്രീറ്റ് നവീകരണ പദ്ധതിയുമായി ദുബായ് ആർ.ടി.എ

ദുബായ് : അൽ സഫ സ്ട്രീറ്റിൽ ഗതാഗതക്കുരുക്കിന് പരിഹാരമായി പുതിയ പാലങ്ങളും തുരങ്കങ്ങളും അധിക ലെയിനുകളും നിർമ്മിക്കുന്ന പദ്ധതിയുമായി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA). ഷെയ്ഖ് സായിദ് റോഡിനും അൽ വസൽ സ്ട്രീറ്റിനുമിടയിലുള്ള 1,500 മീറ്റർ ഭാഗത്താണ് റോഡ് വികസന പ്രവർത്തനങ്ങൾ പുരോഗമിക്കുന്നത്. നിലവിൽ ഈ മേഖലയിലൂടെ യാത്ര ചെയ്യുന്ന വാഹനമോടിക്കുന്നവർക്ക് തടസ്സമില്ലാത്ത ഗതാഗതം ഉറപ്പാക്കുകയാണ് പദ്ധതിയുടെ പ്രധാന ലക്ഷ്യം.
പദ്ധതി പൂർത്തിയാകുന്നതോടെ ഈ പാതയിലൂടെയുള്ള യാത്രാസമയം 12 മിനിറ്റിൽ നിന്ന് കേവലം 3 മിനിറ്റായി കുറയും. കൂടാതെ റോഡിന്റെ ശേഷി ഇരട്ടിയായി വർദ്ധിക്കുന്നതോടെ ഇരുവശങ്ങളിലേക്കുമായി ഒരു മണിക്കൂറിൽ 12,000 വാഹനങ്ങൾക്ക് സുഗമമായി കടന്നുപോകാൻ സാധിക്കും. നിലവിൽ മണിക്കൂറിൽ 6,000 വാഹനങ്ങൾ മാത്രമാണ് ഈ വഴി കടന്നുപോകുന്നത്. നഗരത്തിലെ പ്രധാന പാതകളെ തമ്മിൽ ബന്ധിപ്പിക്കുന്ന ഈ നവീകരണം പൂർത്തിയാകുന്നതോടെ ദുബായിലെ ഗതാഗത സംവിധാനത്തിന് കൂടുതൽ വേഗത കൈവരും.