സുരക്ഷിത അകലം പാലിച്ചില്ല; ദുബായിൽ ട്രക്കുകൾ കൂട്ടിയിടിച്ച് അപകടം.

ദുബായ് : ഗ്ലോബൽ വില്ലേജിൽ നിന്നും ഷാർജയിലേക്കുള്ള റോഡിൽ രണ്ട് ട്രക്കുകൾ കൂട്ടിയിടിച്ച് ഒരാൾക്ക് പരിക്കേറ്റ പശ്ചാത്തലത്തിൽ, വാഹനങ്ങൾ തമ്മിൽ കൃത്യമായ സുരക്ഷിത അകലം പാലിക്കാത്തവർക്കെതിരെ കർശന മുന്നറിയിപ്പുമായി ദുബായ് പോലീസ്. മുൻപിലുള്ള വാഹനങ്ങളോട് തൊട്ടുരുമ്മി ഓടിക്കുന്ന ‘ടെയിൽഗേറ്റിങ്’ (Tailgating) രീതിയാണ് ഈ അപകടത്തിന് കാരണമായതെന്ന് പ്രാഥമിക അന്വേഷണത്തിൽ കണ്ടെത്തി. പരിക്കേറ്റയാളെ വിദഗ്ദ്ധ ചികിത്സയ്ക്കായി ആശുപത്രിയിലേക്ക് മാറ്റി.
റോഡിൽ പെട്ടെന്നുണ്ടാകുന്ന മാറ്റങ്ങളോട് പ്രതികരിക്കാനും അപകടങ്ങൾ ഒഴിവാക്കാനും മുൻപിലുള്ള വാഹനവുമായി കൃത്യമായ അകലം പാലിക്കേണ്ടത് അനിവാര്യമാണെന്ന് ദുബായ് പോലീസ് ട്രാഫിക് ഡിപ്പാർട്ട്മെന്റ് ഡയറക്ടർ ബ്രിഗേഡിയർ ജുമാ സലേം ബിൻ സുവൈദാൻ ഓർമ്മിപ്പിച്ചു. യുഎഇ ഫെഡറൽ ട്രാഫിക് നിയമപ്രകാരം മുൻപിലെ വാഹനവുമായി സുരക്ഷിത അകലം പാലിക്കാത്ത ഡ്രൈവർമാർക്ക് 400 ദിർഹം പിഴയും 4 ബ്ലാക്ക് പോയിന്റുകളും ശിക്ഷയായി ലഭിക്കുമെന്നും പോലീസ് വ്യക്തമാക്കി. ട്രാഫിക് നിയമങ്ങൾ കർശനമായി പാലിക്കുന്നത് വഴി റോഡ് സുരക്ഷ വർദ്ധിപ്പിക്കാൻ പൊതുജനങ്ങൾ സഹകരിക്കണമെന്നും അധികൃതർ ആവശ്യപ്പെട്ടു.