അൽഹിന്ദിന് വൻ തിരിച്ചടി; യുഎഇ ഇന്ത്യൻ പാസ്‌പോർട്ട് സേവന കരാർ കോടതി റദ്ദാക്കി

ദുബൈ : യുഎഇയിലെ ഇന്ത്യൻ പാസ്‌പോർട്ട്, വിസ, അറ്റസ്റ്റേഷൻ സേവനങ്ങൾ ഔട്ട്‌സോഴ്‌സ് ചെയ്യുന്നതിനായി ‘അൽഹിന്ദ് ടൂർസ് ആൻഡ് ട്രാവൽസ്’ കമ്പനിക്ക് നൽകിയ കരാർ ഡൽഹി ഹൈക്കോടതി റദ്ദാക്കി. ടെൻഡർ നടപടികളിലെ സാങ്കേതിക മൂല്യനിർണ്ണയത്തിൽ നിയമപരമായ പിഴവുകൾ ചൂണ്ടിക്കാണിച്ചാണ് കോടതിയുടെ ഈ സുപ്രധാന ഉത്തരവ്. യുഎഇക്ക് (അബുദാബി) പുറമെ കുവൈറ്റ്, സിംഗപ്പൂർ, കാൻബറ (ഓസ്‌ട്രേലിയ) എന്നീ നാല് ഇന്ത്യൻ മിഷനുകളിലും ഒരു മാസത്തിനകം പുതിയ ടെൻഡർ നടപടികൾ ആരംഭിക്കാൻ കോടതി കേന്ദ്ര സർക്കാരിനോട് നിർദ്ദേശിച്ചു. പുതിയ ടെൻഡർ പൂർത്തിയാകുന്നത് വരെ പൊതുജനങ്ങൾക്ക് ബുദ്ധിമുട്ടുണ്ടാകാതിരിക്കാൻ മുൻപ് സേവനം നൽകിയവർക്കോ അല്ലെങ്കിൽ നിലവിലെ സംവിധാനത്തിനോ താൽക്കാലികമായി തുടരാം. പുതിയ ഏജൻസിയെ നിശ്ചയിക്കുന്നത് വരെ അബുദാബിയിലെ ഇന്ത്യൻ എംബസിയും ദുബൈയിലെ കോൺസുലേറ്റും തങ്ങളുടെ ഓഫീസുകൾ വഴി നേരിട്ടായിരിക്കും അടിയന്തര കോൺസുലാർ സേവനങ്ങൾ നൽകുക.