ഖലീഫ സിറ്റി E20 ഹൈവേ അഞ്ച് വരിപ്പാതയാക്കുന്നു; നാല് പുതിയ പാലങ്ങളും നിർമ്മിക്കും

അബുദാബി : ഖലീഫ സിറ്റിയിലെ ഗതാഗതക്കുരുക്ക് ലഘൂകരിക്കുന്നതിനും സായിദ് അന്താരാഷ്ട്ര വിമാനത്താവളത്തിലേക്കുള്ള യാത്രാസൗകര്യം വർദ്ധിപ്പിക്കുന്നതിനുമായി ഇ20 (E20) ഹൈവേ വികസിപ്പിക്കാൻ അബുദാബി മുൻസിപ്പാലിറ്റീസ് ആൻഡ് ട്രാൻസ്പോർട്ട് വകുപ്പ് (DMT) പദ്ധതി പ്രഖ്യാപിച്ചു. നിലവിലുള്ള മൂന്ന് വരിപ്പാത അഞ്ച് വരിപ്പാതയായാണ് ഉയർത്തുന്നത്.
ഹൈവേ വികസനത്തിന് പുറമെ 10.5 കിലോമീറ്റർ നീളത്തിൽ പുതിയ റാമ്പുകളും നാല് പുതിയ പാലങ്ങളും പദ്ധതിയുടെ ഭാഗമായി നിർമ്മിക്കും. ഖലീഫ സിറ്റിയിലെയും എയർപോർട്ട് പരിസരത്തെയും ഗതാഗതം സുഗമമാക്കാൻ 1.5 കിലോമീറ്റർ നീളത്തിൽ ആന്തരിക റോഡുകളും എട്ട് ട്രാഫിക് സിഗ്നൽ ജംഗ്ഷനുകളും സ്ഥാപിക്കും. കൂടാതെ 62 കി.മീ നീളമുള്ള ഡ്രെയിനേജ് ശൃംഖല, 37 കി.മീ ജലസേചന ശൃംഖല, 485 തെരുവ് വിളക്കുകൾ എന്നിവയും പദ്ധതിയുടെ ഭാഗമായി സജ്ജീകരിക്കും.