ദുബായ് : മുതിർന്ന പൗരന്മാരുടെയും പ്രായമായവരുടെയും സുരക്ഷയും സംരക്ഷണവും കൂടുതൽ ശക്തമാക്കുന്നതിനായി ദുബായ് പോലീസും കമ്മ്യൂണിറ്റി ഡെവലപ്‌മെന്റ് അതോറിറ്റിയും (CDA) കൈകോർക്കുന്നു. ലോക വയോജന ചൂഷണ വിരുദ്ധ ദിനാചരണത്തിന്റെ ഭാഗമായി അൽ വർഖ മജ്‌ലിസിൽ സംഘടിപ്പിച്ച പ്രത്യേക ബോധവൽക്കരണ ഫോറത്തിലാണ് മുതിർന്ന പൗരന്മാരുടെ അവകാശങ്ങൾ സംരക്ഷിക്കേണ്ടത് രാജ്യത്തിന്റെ സംയുക്ത ഉത്തരവാദിത്തമാണെന്ന് അധികൃതർ വ്യക്തമാക്കിയത്. ദുബായ് ഒരു വലിയ കുടുംബമാണെന്നും അവിടുത്തെ മുതിർന്ന പൗരന്മാരെ ആദരിക്കുകയും സമൂഹത്തിന്റെ ഭാഗമാക്കി നിർത്തുകയും ചെയ്യണമെന്ന ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തുമിന്റെ കാഴ്ചപ്പാട് മുൻനിർത്തിയാണ് ഈ നടപടി.
പ്രായമായവരെ ചൂഷണങ്ങളിൽ നിന്നും അതിക്രമങ്ങളിൽ നിന്നും സംരക്ഷിക്കുന്നതിനൊപ്പം അവരുടെ അറിവും അനുഭവസമ്പത്തും അടുത്ത തലമുറയ്ക്ക് പകർന്നുനൽകാൻ അനുയോജ്യമായ അന്തരീക്ഷം ഒരുക്കുകയാണ് ലക്ഷ്യമെന്ന് അധികൃതർ അറിയിച്ചു. ദുബായ് സോഷ്യൽ അജണ്ട 33-ന്റെ ലക്ഷ്യങ്ങളെ പിന്തുണച്ചുകൊണ്ട് കൂടുതൽ സുരക്ഷിതവും സുസ്ഥിരവുമായ ഒരു സമൂഹം കെട്ടിപ്പടുക്കുന്നതിനാണ് സിഡിഎയും ദുബായ് പോലീസും സംയുക്തമായി പ്രവർത്തിക്കുന്നത്. വയോജനങ്ങളുടെ അവകാശങ്ങളെക്കുറിച്ച് പൊതുജനങ്ങൾക്കിടയിൽ നിയമപരവും സാമൂഹികവുമായ അവബോധം വളർത്താൻ വരും ദിവസങ്ങളിൽ വിപുലമായ പ്രചാരണങ്ങൾ നടത്തുമെന്നും ഫോറത്തിൽ പങ്കെടുത്ത വിദഗ്ധർ വ്യക്തമാക്കി.
20