മികച്ച നേട്ടങ്ങൾക്കായി പുത്തൻ ‘ദുബായ്-ഇറ്റ്’ (Dubai-it) പുരസ്കാരം പ്രഖ്യാപിച്ച് ഷെയ്ഖ് ഹംദാൻ

ദുബായ് : വലിയ ആശയങ്ങളെ റെക്കോർഡ് വേഗതയിൽ മികച്ച വിജയങ്ങളാക്കി മാറ്റുന്ന വ്യക്തികൾ, പദ്ധതികൾ, കമ്പനികൾ, സ്ഥാപനങ്ങൾ എന്നിവരെ ആദരിക്കുന്നതിനായി പുത്തൻ ‘ദുബായ്-ഇറ്റ്’ (Dubai-it) അവാർഡ് പ്രഖ്യാപിച്ച് ദുബായ് കിരീടാവകാശിയും യുഎഇ പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തും. യുഎഇ ഉപരാഷ്ട്രപതിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തുമിന്റെ വികസന കാഴ്ചപ്പാടുകളിൽ നിന്നും പ്രചോദനമുൾക്കൊണ്ടാണ് ഈ വാർഷിക പുരസ്കാരം ഏർപ്പെടുത്തിയിരിക്കുന്നത്.
ഏതൊരു വലിയ ലക്ഷ്യത്തെയും മികവോടെയും അതിവേഗത്തിലും യാഥാർത്ഥ്യമാക്കുക എന്ന ദുബായുടെ പ്രവർത്തന ശൈലിയെയാണ് ‘ദുബായ്-ഇറ്റ്’ എന്ന ഫിലോസഫി കൊണ്ട് അർത്ഥമാക്കുന്നത്. സർക്കാർ പ്രവർത്തനങ്ങൾ, റിയൽ എസ്റ്റേറ്റ്, സാമ്പത്തികം, വിദ്യാഭ്യാസം, സാങ്കേതികവിദ്യ, സാമൂഹിക സേവനം എന്നീ മേഖലകളിലെ മികച്ച നേട്ടങ്ങൾക്കാണ് അവാർഡ് നൽകുക. മികച്ച ഫലം നൽകിയ സർക്കാർ പ്രോജക്ടുകൾ, സാങ്കേതിക പദ്ധതികൾ, മികച്ച കമ്പനികൾ, ഗവൺമെന്റ് പ്രോജക്ട് മാനേജർമാർ, മികച്ച സംരംഭകർ എന്നിവർക്ക് വിവിധ വിഭാഗങ്ങളിലായി പുരസ്കാരങ്ങൾ സമ്മാനിക്കും.