ജൂലൈയിൽ യുഎഇയിൽ ഇന്ധനവില കുറഞ്ഞേക്കും

ദുബായ് : കഴിഞ്ഞ നാല് മാസമായി തുടർച്ചയായി വർദ്ധിച്ചുകൊണ്ടിരുന്ന യുഎഇയിലെ പെട്രോൾ വിലയിൽ ജൂലൈ മാസത്തിൽ ഗണ്യമായ കുറവുണ്ടായേക്കുമെന്ന് സൂചന. അന്താരാഷ്ട്ര വിപണിയിൽ അസംസ്‌കൃത എണ്ണവില (Crude oil prices) ബാരലിന് 20 ഡോളറിലധികം ഇടിഞ്ഞതാണ് ഇതിന് കാരണം. മിഡിൽ ഈസ്റ്റിലെ സംഘർഷങ്ങളെ തുടർന്ന് ഫെബ്രുവരി മുതൽ യുഎഇയിൽ ഇന്ധനവിലയിൽ വലിയ വർദ്ധനവുണ്ടായിരുന്നു. ജൂണിൽ പെട്രോൾ വില 8 ശതമാനം ഉയർന്ന് സൂപ്പർ 98-ന് 3.95 ദിർഹത്തിലും സ്പെഷ്യൽ 95-ന് 3.83 ദിർഹത്തിലുമാണ് വിപണനം നടക്കുന്നത്.
എന്നാൽ, യുഎസും ഇറാനും തമ്മിലുള്ള സമാധാന ചർച്ചകളും ഹോർമുസ് കടലിടുക്ക് വഴിയുള്ള കപ്പൽ ഗതാഗതം പുനരാരംഭിച്ചതും ആഗോള വിപണിയിൽ എണ്ണ വിതരണം വർദ്ധിപ്പിച്ചു. ഇതോടെ ജൂൺ ആദ്യവാരം ബാരലിന് 95 ഡോളറോളമായിരുന്ന ബ്രെന്റ് ക്രൂഡ് വില നിലവിൽ 74 ഡോളറിലേക്ക് താഴേക്ക് പതിച്ചു. ആഗോള വിപണിയിലെ ഈ അനുകൂല മാറ്റം പ്രതിഫലിപ്പിച്ചുകൊണ്ട് ഈ മാസാവസാനം പ്രഖ്യാപിക്കുന്ന ജൂലൈയിലെ പുതിയ നിരക്കിൽ പെട്രോൾ വില കുറയുമെന്നാണ് സാമ്പത്തിക വിദഗ്ധരുടെ വിലയിരുത്തൽ.