ദുബായ് : അറബ് മാധ്യമ മേഖലയിലെ മികവിനെ ആദരിക്കുന്ന ‘അറബ് മീഡിയ അവാർഡ്’ (Arab Media Award) കാൽ നൂറ്റാണ്ട് പിന്നിടുന്നതിന്റെ സന്തോഷം പങ്കുവെച്ച് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം. മാധ്യമ രംഗത്തെ ദ്രുതഗതിയിലുള്ള മാറ്റങ്ങൾക്കൊത്ത് മുന്നേറാനും വിവിധ മാധ്യമ മേഖലകളിലെ പ്രതിഭകളെ ആദരിക്കാനും ഈ പുരസ്കാരത്തിന് സാധിച്ചിട്ടുണ്ടെന്ന് അദ്ദേഹം എക്‌സിൽ (X) കുറിച്ചു.
പാൽ നൂറ്റാണ്ട് മുമ്പ് ‘അറബ് ജേർണലിസം അവാർഡ്’ എന്ന പേരിൽ ആരംഭിച്ച ഈ സംരംഭം ഇതുവരെ 360-ലധികം മുൻനിര മാധ്യമപ്രവർത്തകരെയും ചിന്തകരെയും മാധ്യമരംഗത്തെ പ്രമുഖരെയുമാണ് ആദരിച്ചത്. പിന്നീട് കാലോചിതമായി ‘അറബ് മീഡിയ അവാർഡ്’ എന്ന് പുനർനാമകരണം ചെയ്യപ്പെടുകയും മാധ്യമ ലോകത്തിന്റെ എല്ലാ തലങ്ങളിലേക്കും വ്യാപ്തി വർദ്ധിപ്പിക്കുകയുമായിരുന്നു. ഷെയ്ഖ് അഹമ്മദ് ബിൻ മുഹമ്മദ് ബിൻ റാഷിദ് അൽ മക്തൂമിന്റെ നേതൃത്വത്തിലാണ് അറബ് മീഡിയ സമ്മിറ്റിന് കീഴിൽ അവാർഡിന്റെ തുടർന്നുള്ള യാത്രയെന്നും മാധ്യമ മേഖലയിലെ മികവ് ആഘോഷിക്കുന്നത് അവാർഡ് തുടരുമെന്നും ഷെയ്ഖ് മുഹമ്മദ് കൂട്ടിച്ചേർത്തു.
