വിദ്യാർത്ഥികൾക്കും ഹജ്ജ്-ഉംറ തീർത്ഥാടകർക്കും ഇൻഫ്ലുവൻസ വാക്സിൻ മുൻഗണന നൽകി യുഎഇ

അബുദാബി : 2026-27 ദേശീയ സീസണൽ ഇൻഫ്ലുവൻസ പ്രതിരോധ കാമ്പെയ്‌ന്റെ ഭാഗമായി കൂടുതൽ ജനവിഭാഗങ്ങൾക്ക് സൗജന്യ വാക്സിനേഷന് മുൻഗണന നൽകി യുഎഇ ആരോഗ്യ മന്ത്രാലയം. സ്കൂൾ വിദ്യാർത്ഥികൾ, ഹജ്ജ്-ഉംറ തീർത്ഥാടനത്തിന് പോകുന്നവർ എന്നിവരെക്കൂടി വാക്സിനേഷന്റെ മുൻഗണനാ വിഭാഗത്തിൽ (Priority Groups) പുതുതായി ഉൾപ്പെടുത്തി. സീസണൽ രോഗങ്ങൾ പടരുന്നതിന് മുന്നോടിയായി പ്രതിരോധ പ്രവർത്തനങ്ങൾ ശക്തമാക്കുന്നതിന്റെ ഭാഗമായാണ് നടപടി.
ഗർഭിണികൾ, ആറ് മാസത്തിന് മുകളിൽ പ്രായമുള്ള കുട്ടികൾ, മുതിർന്ന പൗരന്മാർ, വിട്ടുമാറാത്ത രോഗമുള്ളവർ, ആരോഗ്യപ്രവർത്തകർ എന്നിവരാണ് മുൻഗണനാ പട്ടികയിലുള്ള മറ്റ് വിഭാഗങ്ങൾ. ചൊവ്വാഴ്ച ആരംഭിച്ച സീസണൽ ശ്വാസകോശ രോഗ ബോധവൽക്കരണ കാമ്പെയ്‌നിലാണ് ആരോഗ്യ മന്ത്രാലയം ഇക്കാര്യം വ്യക്തമാക്കിയത്. എമിറേറ്റ്‌സ് ഹെൽത്ത് സർവീസസിന് (EHS) കീഴിലുള്ള 121 ആരോഗ്യ കേന്ദ്രങ്ങളിലും വാക്സിൻ ലഭ്യമാക്കിയിട്ടുണ്ട്. കൂടാതെ വിദ്യാർത്ഥികൾക്കിടയിലെ രോഗപ്പകർച്ച തടയാനായി സ്കൂളുകൾ കേന്ദ്രീകരിച്ചും പ്രത്യേക വാക്സിനേഷൻ, ബോധവൽക്കരണ പരിപാടികൾ ആരംഭിച്ചിട്ടുണ്ട്.