ഓപ്പറേഷണൽ റിസ്‌ക് ബാങ്കിംഗ് സുരക്ഷ ശക്തമാക്കാൻ കർശന മാനദണ്ഡങ്ങളുമായി യുഎഇ സെൻട്രൽ ബാങ്ക്

അബുദാബി : ബാങ്കിംഗ്, ധനകാര്യ മേഖലകളിലെ പ്രവർത്തന തടസ്സങ്ങളും നഷ്ടങ്ങളും ഒഴിവാക്കുന്നതിനായി ‘ഓപ്പറേഷണൽ റിസ്‌ക് മാനേജ്‌മെന്റ്’ (Operational Risk Management) മുൻനിർത്തി പുതിയ നിർദ്ദേശങ്ങൾ പ്രാബല്യത്തിൽ വരുത്തി യുഎഇ സെൻട്രൽ ബാങ്ക്. 2026 സെപ്റ്റംബർ 14 മുതൽ പ്രാബല്യത്തിൽ വന്ന സി 1/2026 (Regulation No. C 1/2026) നമ്പർ റഗുലേഷൻ പ്രകാരം ബാങ്കുകൾക്ക് പുറമെ രാജ്യത്ത് പ്രവർത്തിക്കുന്ന ലൈസൻസുള്ള മുഴുവൻ ധനകാര്യ സ്ഥാപനങ്ങൾക്കും ഈ നിയമങ്ങൾ ബാധകമാണ്. പണമിടപാട് തടസ്സപ്പെടുന്നത് ഒഴിവാക്കുക, വേഗത്തിൽ സേവനങ്ങൾ പുനഃസ്ഥാപിക്കുക എന്നിവയാണ് പുതിയ നിയന്ത്രണങ്ങളുടെ ലക്ഷ്യം.
ഓപ്പറേഷണൽ റിസ്‌ക് മാനേജ്‌മെന്റിലും സ്ഥാപനങ്ങളുടെ പ്രവർത്തനപരമായ അതിജീവന ശേഷിയിലും (Operational Resilience) പാലിക്കേണ്ട കുറഞ്ഞ നിബന്ധനകളാണ് പുതിയ ചട്ടത്തിൽ ഉൾപ്പെടുത്തിയിരിക്കുന്നത്. അടിയന്തിര സാഹചര്യങ്ങളിൽ ആവശ്യാനുസരണം കൂടുതൽ നിയമങ്ങളും കൃത്യമായ നിർദ്ദേശങ്ങളും മാർഗ്ഗനിർദ്ദേശങ്ങളും പുറപ്പെടുവിക്കാൻ സെൻട്രൽ ബാങ്കിന് ഈ നിയമപ്രകാരം പൂർണ്ണ അധികാരമുണ്ടായിരിക്കും. ഡിജിറ്റൽ ഇടപാടുകൾ വർദ്ധിച്ചുവരുന്ന സാഹചര്യത്തിൽ ബാങ്കിംഗ് മേഖലയുടെ സുസ്ഥിരത ഉറപ്പുവരുത്താൻ ഈ ഇടപെടൽ സഹായിക്കും.