ബാങ്കിംഗ് സുരക്ഷ ശക്തമാക്കാൻ കർശന നിയന്ത്രണങ്ങളുമായി യുഎഇ സെൻട്രൽ ബാങ്ക്

അബുദാബി : ബാങ്കിംഗ് സേവനങ്ങളിലെ സാങ്കേതിക തടസ്സങ്ങൾ, സൈബർ ആക്രമണങ്ങൾ, സാമ്പത്തിക തട്ടിപ്പുകൾ എന്നിവയിൽ നിന്ന് ഉപഭോക്താക്കളെ സംരക്ഷിക്കുന്നതിനായി കർശന നിയന്ത്രണ മാനദണ്ഡങ്ങൾ പ്രാബല്യത്തിൽ വരുത്തി യുഎഇ സെൻട്രൽ ബാങ്ക്. 2026 സെപ്റ്റംബർ 14 മുതൽ നിലവിൽ വന്ന പുതിയ ‘ഓപ്പറേഷണൽ റിസ്ക് മാനേജ്മെന്റ്’ (Operational Risk Management) ചട്ടങ്ങൾ രാജ്യത്തെ ബാങ്കുകൾക്കും അംഗീകൃത ധനകാര്യ സ്ഥാപനങ്ങൾക്കും ബാധകമാണ്. 2018-ൽ പുറപ്പെടുവിച്ച പഴയ നിർദ്ദേശങ്ങൾക്ക് പകരമായാണ് ഈ പുതിയ സമഗ്ര നിയമനിർമ്മാണം നടത്തിയിരിക്കുന്നത്.
മൊബൈൽ ബാങ്കിംഗ് ആപ്പുകൾ, ഡിജിറ്റൽ വാലറ്റുകൾ, ഓൺലൈൻ പണമിടപാടുകൾ എന്നിവ വ്യാപകമായ സാഹചര്യത്തിൽ ഉണ്ടാകുന്ന ഏതൊരു സാങ്കേതിക തടസ്സവും ഉപഭോക്താക്കളെ നേരിട്ട് ബാധിക്കുന്നതിനാലാണ് സെൻട്രൽ ബാങ്കിന്റെ ഈ ഇടപെടൽ. പുതിയ നിർദ്ദേശപ്രകാരം, ഓരോ ബാങ്കും അടിയന്തിര സാഹചര്യങ്ങളെ നേരിടാൻ സമഗ്രമായ മുൻകരുതൽ പദ്ധതികൾ തയ്യാറാക്കണം. പണമിടപാടുകൾ, ശമ്പളം ലഭിക്കുന്ന അക്കൗണ്ടുകൾ, കാർഡ് സേവനങ്ങൾ തുടങ്ങിയ നിർണ്ണായക പ്രവർത്തനങ്ങളിലെ തടസ്സങ്ങൾ പരിഹരിക്കാൻ കൃത്യമായ സമയപരിധിയും മാനദണ്ഡങ്ങളും നിശ്ചയിച്ചിട്ടുണ്ട്. സാങ്കേതിക തടസ്സങ്ങളുണ്ടായാൽ സേവനങ്ങൾ എത്രയും വേഗം പുനഃസ്ഥാപിക്കാൻ ബാങ്കുകൾക്ക് നിയമപരമായ ഉത്തരവാദിത്തമുണ്ടായിരിക്കും.