പെട്രോൾ അടിച്ചാൽ പോക്കറ്റ് കാലിയാകുമോ? ഒക്ടോബറിൽ യുഎഇയിൽ ഇന്ധന വില വീണ്ടും കൂടിയേക്കും

ദുബായ് : ആഗോള വിപണിയിൽ അസംസ്കൃത എണ്ണവില ഉയർന്ന നിലയിൽ തുടരുന്ന സാഹചര്യത്തിൽ യുഎഇയിൽ അടുത്ത മാസം ഇന്ധന വില വീണ്ടും വർധിച്ചേക്കുമെന്ന് റിപ്പോർട്ട്. സെപ്റ്റംബർ മാസം മുഴുവൻ ക്രൂഡോയിൽ വില ഉയർന്ന നിരക്കിലാണ് വ്യാപാരം നടത്തിയതെങ്കിലും, പ്രാദേശിക വിതരണ ശൃംഖലയിലുണ്ടായ പുരോഗതി വിലക്കയറ്റത്തിന്റെ ആഘാതം കുറയ്ക്കുമെന്നാണ് വിലയിരുത്തൽ. ബുധനാഴ്ച ബ്രെന്റ് ക്രൂഡ് വില 2.3 ശതമാനം ഉയർന്ന് ബാരലിന് 101.52 ഡോളറായി എത്തിയിരുന്നു. ഫെബ്രുവരി അവസാനത്തിലെ 72 ഡോളറുമായി താരതമ്യം ചെയ്യുമ്പോൾ ക്രൂഡോയിൽ വിലയിൽ ഏകദേശം 41 ശതമാനത്തിന്റെ വർധനവാണ് ഉണ്ടായിരിക്കുന്നത്. മിഡിൽ ഈസ്റ്റിലെ ഊർജ്ജ കയറ്റുമതിയെക്കുറിച്ചുള്ള ആശങ്കകൾ കാരണം കഴിഞ്ഞ ആഴ്ചകളിൽ ബ്രെന്റ് വില ബാരലിന് 110 ഡോളർ വരെ അടുത്തെത്തിയിരുന്നു. ഒറ്റ ദിവസത്തെ വിലയേക്കാൾ സെപ്റ്റംബർ മാസത്തിലെ പൊതുവായ വിലക്കയറ്റ ട്രെൻഡാണ് ഒക്ടോബറിലെ ഇന്ധന വില നിർണ്ണയിക്കുന്നതിൽ നിർണ്ണായകമാവുക.