ദുബായ് : കുട്ടികൾ രക്ഷിതാക്കളുടെ മേൽനോട്ടമില്ലാതെ ഓൺലൈൻ ഷോപ്പിങ്, ഡെവലിവറി ആപ്പുകൾ എന്നിവ ഉപയോഗിക്കുന്നത് ഗുരുതരമായ സുരക്ഷാ ഭീഷണികൾക്ക് കാരണമാകുമെന്ന് യുഎഇയിലെ ചൈൽഡ് സേഫ്റ്റി ഓർഗനൈസേഷൻ മുന്നറിയിപ്പ് നൽകി. വീടുകളിലേക്ക് ആവശ്യമായ ഭക്ഷണസാധനങ്ങളും മറ്റ് അവശ്യവസ്തുക്കളും ഓർഡർ ചെയ്യുന്നത് ദൈനംദിന ജീവിതത്തിന്റെ ഭാഗമായി മാറിയിട്ടുണ്ടെങ്കിലും കുട്ടികൾ സ്വന്തം നിലയിൽ ഇത്തരം ആപ്പുകൾ ഉപയോഗിക്കുന്നത് വലിയ വീഴ്ചകൾക്ക് ഇടയാക്കുമെന്നാണ് ശാർജ ഫാമിലി ആൻഡ് കമ്മ്യൂണിറ്റി കൗൺസിലിന്റെ കീഴിലുള്ള സംഘടന വ്യക്തമാക്കുന്നത്. പലപ്പോഴും രക്ഷിതാക്കൾ അറിയാതെ കുട്ടികൾ സ്മാർട്ട്ഫോണുകൾ ഉപയോഗിച്ച് ആഹാരവും കളിപ്പാട്ടങ്ങളും ഓർഡർ ചെയ്യുകയും ഡെലിവറി ജീവനക്കാർ എത്തുമ്പോൾ നേരിട്ട് പോയി സാധനങ്ങൾ വാങ്ങുകയും ചെയ്യാറുണ്ട്. ഇത് അപരിചിതരായ വ്യക്തികളുമായി കുട്ടികൾ നേരിട്ട് സമ്പർക്കത്തിൽ വരാനും ഓൺലൈൻ വഴി പണം നഷ്ടപ്പെടാനും കാരണമായേക്കാം. സാങ്കേതികവിദ്യയുടെ ഉപയോഗത്തെ നിരുത്സാഹപ്പെടുത്തുകയല്ല, മറിച്ച് ഡിജിറ്റൽ ഇടപാടുകളിലും വീട്ടുസാധനങ്ങൾ വാങ്ങുന്നതിലും കുട്ടികൾക്ക് കൃത്യമായ അതിർവരമ്പുകൾ നിശ്ചയിച്ചു നൽകാൻ മാതാപിതാക്കൾ ജാഗ്രത പാലിക്കണമെന്നും അധികൃതർ ഓർമ്മിപ്പിച്ചു.
