പെരുന്നാൾ സമ്മാനം; യുഎഇയിലെ പ്രമുഖ എമിറേറ്റുകളിൽ പൊതു പാർക്കിങ് സൗജന്യമാക്കി

യുഎഇ : ബലിപെരുന്നാൾ പ്രമാണിച്ചുള്ള നീണ്ട അവധിക്കാലത്ത് ജനങ്ങളുടെ യാത്രകൾ സുഗമമാക്കുന്നതിന്റെ ഭാഗമായി യുഎഇയിലെ വിവിധ എമിറേറ്റുകളിൽ പൊതു പാർക്കിങ് സൗജന്യമായി പ്രഖ്യാപിച്ചു. ദുബായ്, അബുദാബി, ഷാർജ, അജ്മാൻ എന്നീ പ്രമുഖ എമിറേറ്റുകളിലാണ് നിശ്ചിത പൊതു പാർക്കിങ് കേന്ദ്രങ്ങളിൽ താൽക്കാലികമായി ഫീസ് ഒഴിവാക്കിയത്. ദുബായിലും അബുദാബിയിലും മെയ് 25 തിങ്കൾ മുതൽ മെയ് 29 വെള്ളി വരെയാണ് സൗജന്യ പാർക്കിങ് അനുവദിച്ചിരിക്കുന്നത്. അജ്മാനിൽ മെയ് 26 ചൊവ്വാഴ്ച മുതൽ മെയ് 29 വെള്ളിയാഴ്ച വരെയും, ഷാർജയിൽ പെരുന്നാളിന്റെ ആദ്യ മൂന്ന് ദിവസങ്ങളായ മെയ് 27 ബുധൻ മുതൽ മെയ് 29 വെള്ളി വരെയുമാണ് പാർക്കിങ് സൗജന്യമായിരിക്കുക. എന്നാൽ മിക്ക എമിറേറ്റുകളിലെയും മൾട്ടി-സ്റ്റോറി (ബഹുനില) പാർക്കിങ് കെട്ടിടങ്ങളിൽ ഈ ഇളവ് ബാധകമായിരിക്കില്ലെന്നും അവിടെ സാധാരണ നിരക്കിൽ ഫീസ് ഈടാക്കുമെന്നും അധികൃതർ വ്യക്തമാക്കി. പെരുന്നാൾ തിരക്ക് നിയന്ത്രിക്കുന്നതിനും യാത്രക്കാർക്ക് കൂടുതൽ സൗകര്യമൊരുക്കുന്നതിനുമായി പൊതുഗതാഗത സമയക്രമങ്ങളിൽ മാറ്റം വരുത്തിയതിനൊപ്പം ചിലയിടങ്ങളിൽ ടോൾ ഒഴിവാക്കുകയും ചെയ്തിട്ടുണ്ട്.