ഷാർജയിൽ ബലിപെരുന്നാൾ നമസ്കാരത്തിനായി 698 മസ്ജിദുകൾ ഒരുങ്ങി; സമയക്രമം പ്രഖ്യാപിച്ചു

ഷാർജ : ഈ വർഷത്തെ ബലിപെരുന്നാൾ നമസ്കാരത്തിനായി ഷാർജ എമിറേറ്റിലുടനീളം 698 മസ്ജിദുകളും ഈദ് ഗാഹുകളും പൂർണ്ണ സജ്ജമാക്കിയതായി ഷാർജ ഇസ്ലാമിക് അഫയേഴ്സ് ഡിപ്പാർട്ട്മെന്റ് അറിയിച്ചു. എമിറേറ്റിലെ വിവിധ നഗരങ്ങളിലും മേഖലകളിലുമായി എത്തുന്ന വൻ ജനബാഹ്യത്തെ ഉൾക്കൊള്ളാൻ തക്കവണ്ണമാണ് മസ്ജിദുകൾ ക്രമീകരിച്ചിരിക്കുന്നത്. പെരുന്നാൾ നമസ്കാരത്തിനായുള്ള കൃത്യമായ സമയക്രമവും വകുപ്പ് പുറത്തുവിട്ടിട്ടുണ്ട്. ഇതനുസരിച്ച് ഷാർജ സിറ്റി, അൽ ഹംരിയ, അൽ മദാം, മ്ലെയ്ഹ എന്നീ പ്രദേശങ്ങളിൽ രാവിലെ 5:45-നാണ് പെരുന്നാൾ നമസ്കാരം നടക്കുക. അൽ ദൈദ്, അൽ ബത്തായ മേഖലകളിൽ രാവിലെ 5:44-നും ഷാർജയുടെ കിഴക്കൻ മേഖലകളിൽ (ഈസ്റ്റേൺ റീജിയൻ) പുലർച്ചെ 5:42-നുമാണ് നമസ്കാരം നിശ്ചയിച്ചിരിക്കുന്നത്. വിശ്വാസികൾക്ക് സുഗമമായി നമസ്കാരം നിർവഹിക്കുന്നതിനായി മസ്ജിദുകളിലും പരിസരങ്ങളിലും ആവശ്യമായ എല്ലാ സുരക്ഷാ-ശുചീകരണ ക്രമീകരണങ്ങളും പൂർത്തിയായതായി അധികൃതർ വ്യക്തമാക്കി.