ഗാസയിലെ ആരോഗ്യമേഖലയ്ക്ക് താങ്ങായി യുഎഇ

യുഎഇ : ഗാസയിലെ തകർന്ന ആരോഗ്യമേഖലയെ പുനരുജ്ജീവിപ്പിക്കുന്നതിനും അടിയന്തര മാനുഷിക സാഹചര്യങ്ങൾ നേരിടുന്നതിനുമായി യുഎഇയുടെ പുതിയ സഹായസംഘം ഗാസയിലെത്തി. 40 ടൺ അത്യാവശ്യ മെഡിക്കൽ സാമഗ്രികളും അത്യാധുനിക സൌകര്യങ്ങളുള്ള നാല് ആംബുലൻസുകളുമാണ് യുഎഇ ഇത്തവണ കൈമാറിയത്. ഗാസയിലെ ജനങ്ങളുടെ ദുരിതം ലഘൂകരിക്കുന്നതിനായി യുഎഇ നടത്തിവരുന്ന മാനുഷിക ദുരിതാശ്വാസ പ്രവർത്തനമായ ‘ഓപ്പറേഷൻ ഗാലന്റ് നൈറ്റ് 3’-യുടെ (Operation Gallant Knight 3) ഭാഗമായാണ് ഈ സഹായം എത്തിച്ചത്. നിലവിലെ സങ്കീർണ്ണമായ സാഹചര്യങ്ങളിൽ ആശുപത്രികളുടെ പ്രവർത്തനം മെച്ചപ്പെടുത്താനും 24 മണിക്കൂറും ജോലി ചെയ്യുന്ന ആരോഗ്യപ്രവർത്തകർക്ക് ആവശ്യമായ പിന്തുണ നൽകാനും പുതിയ മെഡിക്കൽ സഹായം സഹായിക്കും. ഗാസയിലെ പ്രതിസന്ധി ആരംഭിച്ചതു മുതൽ ദുരിതബാധിതരായ കുടുംബങ്ങളെ സഹായിക്കാനും ആരോഗ്യ-ദുരിതാശ്വാസ മേഖലകളിൽ ആവശ്യമായ പിന്തുണ ഉറപ്പാക്കാനുമുള്ള യുഎഇയുടെ നിരന്തരമായ പ്രതിബദ്ധതയാണ് ഈ ദൗത്യത്തിലൂടെ വീണ്ടും വ്യക്തമാകുന്നത്.