ദുബായ് : ദുബായ് ഡേറ്റ്സ് ഫെസ്റ്റിവലിൽ പങ്കെടുത്തവർക്കായി 10 ലക്ഷം ദിർഹത്തിന്റെ (1 മില്യൺ ദിർഹം) പ്രത്യേക സാമ്പത്തിക സഹായം പ്രഖ്യാപിച്ച് ദുബായ് കിരീടാവകാശിയും ഉപപ്രധാനമന്ത്രിയും പ്രതിരോധമന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. യുഎഇയുടെ പരമ്പരാഗത പൈതൃകവും ഈന്തപ്പന കൃഷിയും സംരക്ഷിക്കുന്നതിൽ കർഷകരും പങ്കാളികളും നൽകുന്ന മികച്ച സംഭാവനകളെ മാനിച്ചാണ് ഈ ആനുകൂല്യം അനുവദിച്ചിരിക്കുന്നത്.
ദുബായ്-അൽ ഐൻ റോഡിലെ ഖലാത്ത് അൽ റിമാലിൽ നടന്നു വന്ന ഡേറ്റ്സ് ഫെസ്റ്റിവലിന്റെ മൂന്നാം പതിപ്പ് അടുത്തിടെയാണ് സമാപിച്ചത്. ഈന്തപ്പന കർഷകരെയും ഉൽപ്പാദകരേയും പ്രോത്സാഹിപ്പിക്കുന്നതിനായി 15 വ്യത്യസ്ത മത്സരങ്ങളാണ് മേളയിൽ സംഘടിപ്പിച്ചിരുന്നത്. ഇതിനുപുറമേ, കമ്മ്യൂണിറ്റി ഡെവലപ്‌മെന്റ് അതോറിറ്റിയുടെ (CDA) നേതൃത്വത്തിൽ ‘ഖറായെഫ് അൽ റുതബ്’ പദ്ധതിയിലൂടെ അയ്യായിരത്തിലധികം കുടുംബങ്ങൾക്ക് സൗജന്യമായി ഈന്തപ്പഴം എത്തിച്ചു നൽകുന്ന ജീവകാരുണ്യ പ്രവർത്തനങ്ങളും പുരോഗമിക്കുന്നുണ്ട്.
