അബുദാബി : ഫെഡറൽ അതോറിറ്റി ഫോർ ന്യൂക്ലിയർ റഗുലേഷൻ (FANR) ഡയറക്ടർ ജനറലായി ഹമദ് അലി മുഹമ്മദ് അൽ കാബിയെ നിയമിച്ചുകൊണ്ട് യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ ഫെഡറൽ ഉത്തരവ് പുറപ്പെടുവിച്ചു. അണ്ടർ സെക്രട്ടറി പദവിയോടെയാണ് പുതിയ നിയമനം.
യുഎഇയുടെ ആണവ ഊർജ്ജ രംഗത്ത് ദീർഘകാലത്തെ പ്രവർത്തന പരിചയമുള്ള വ്യക്തിയാണ് ഹമദ് അൽ കാബി. 2008 മുതൽ അന്താരാഷ്ട്ര ആണവോർജ്ജ ഏജൻസിയിലെ (IAEA) യുഎഇയുടെ സ്ഥിരം പ്രതിനിധിയായി അദ്ദേഹം സേവനമനുഷ്ഠിച്ച് വരികയാണ്. നിരവധി അന്താരാഷ്ട്ര സംഘടനകളിൽ യുഎഇയെ പ്രതിനിധീകരിച്ചിട്ടുള്ള അദ്ദേഹം ഓസ്ട്രിയ, സ്ലൊവാക് റിപ്പബ്ലിക്, സ്ലൊവേനിയ എന്നീ രാജ്യങ്ങളിലെ യുഎഇ അംബാസഡറായും മികച്ച രീതിയിൽ ചുമതലകൾ നിർവ്വഹിച്ചിട്ടുണ്ട്. യുഎഇയുടെ ആണവ സുരക്ഷാ നിയന്ത്രണങ്ങൾ കൂടുതൽ ശക്തമാക്കുന്നതിലേക്ക് അദ്ദേഹത്തിന്റെ ഈ വിപുലമായ പരിചയസമ്പത്ത് നിർണ്ണായക പങ്ക് വഹിക്കുമെന്ന് വിലയിരുത്തപ്പെടുന്നു.
