ദുബായ് : വാഹനങ്ങളുടെ ഫാക്ടറി സവിശേഷതകളിൽ മാറ്റം വരുത്തുന്ന വിധത്തിലുള്ള വലിയ എൻജിൻ പരിഷ്കരണങ്ങൾക്കും അമിത ശബ്ദമുണ്ടാക്കുന്ന മാറ്റിമറയ്ക്കലുകൾക്കും അനുമതി നൽകില്ലെന്ന് വ്യക്തമാക്കി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). റോഡ് സുരക്ഷ ഉറപ്പാക്കുന്നതിനും അംഗീകൃത സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തുന്നതിനുമാണ് ഈ തീരുമാനമെന്ന് ആർടിഎ ലൈസൻസിംഗ് ഏജൻസി സിഇഒ അഹമ്മദ് മഹ്ബൂബ് അറിയിച്ചു.
വാഹനങ്ങളിൽ എന്തെങ്കിലും തരത്തിലുള്ള മാറ്റങ്ങൾ വരുത്തുന്നതിന് മുൻപ് അതോറിറ്റിയുമായി ബന്ധപ്പെടണമെന്ന് അധികൃതർ ഉടമകളോട് ആവശ്യപ്പെട്ടു. എൻജിനിൽ വരുത്തുന്ന വലിയ മാറ്റങ്ങൾക്കും വാഹനം ഉണ്ടാക്കുന്ന ശബ്ദം കൂട്ടുന്നതിനും ഒരു കാരണവശാലും അനുമതി ലഭിക്കില്ല. വാഹനങ്ങളിൽ അനുവദനീയമായ പരമാവധി ശബ്ദപരിധി 95 ഡെസിബെൽ ആയി നിജപ്പെടുത്തിയിട്ടുണ്ട്. റോഡ് യാത്രക്കാരുടെയും കാൽനടയാത്രക്കാരുടെയും സുരക്ഷ മുൻനിർത്തി ഇതിനെതിരെ പരിശോധനകൾ ശക്തമാക്കുമെന്നും ആർടിഎ വ്യക്തമാക്കി.