യുഎഇയിൽ ഉച്ചയ്ക്ക് ശേഷം മഴയ്ക്ക് സാധ്യത

അബുദാബി : യുഎഇയിൽ ഇന്ന് ഉച്ചയ്ക്ക് ശേഷം മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രത്തിന്റെ (NCM) മുന്നറിയിപ്പ്. രാജ്യത്തിന്റെ കിഴക്കൻ മേഖലകളിൽ മഴമേഘങ്ങൾ (Convective Clouds) രൂപപ്പെടാൻ സാധ്യതയുണ്ടെന്നും പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കുമെന്നും കാലാവസ്ഥാ കേന്ദ്രം അറിയിച്ചു. രാത്രിയിലും ചൊവ്വാഴ്ച രാവിലെയുമായി തീരദേശ, ആഭ്യന്തര മേഖലകളിൽ മൂടൽമഞ്ഞിനും ആർദ്രത വർദ്ധിക്കാനും സാധ്യതയുണ്ട്.
അബുദാബിയിൽ 29°C മുതൽ 39°C വരെയും ദുബായിൽ 31°C മുതൽ 41°C വരെയുമായിരിക്കും താപനില. മണിക്കൂറിൽ 10 മുതൽ 25 കിലോമീറ്റർ വേഗതയിൽ വീശുന്ന കാറ്റ് ചില സമയങ്ങളിൽ 40 കിലോമീറ്റർ വരെ വേഗത പ്രാപിക്കാനും ഇത് പൊടിപടലങ്ങൾ ഉയരാനും കാരണമാകും. അറേബ്യൻ ഗൾഫിലും ഒമാൻ കടലിലും കടൽ ശാന്തമായിരിക്കുമെന്നും മുന്നറിയിപ്പിൽ പറയുന്നു.