യുഎഇ ലൂപ്പ്: ബോറിങ് കമ്പനിയുടെ 3 ബില്യൺ ഡോളർ പദ്ധതി

ദുബായ് : ശതകോടീശ്വരൻ ഇലോൺ മസ്കിന്റെ ഭൂഗർഭ ഗതാഗത കമ്പനിയായ ‘ദി ബോറിങ് കമ്പനി’ (The Boring Company) യുഎഇയിൽ 150 കിലോമീറ്ററിലധികം ദൈർഘ്യമുള്ള ടണൽ ശൃംഖല നിർമ്മിക്കുന്നു. പദ്ധതിക്കായി യുഎഇ അധിഷ്ഠിത കമ്പനികളുടെ നേതൃത്വത്തിൽ സീരീസ് ഡി ഫണ്ടിംഗ് വഴി 3 ബില്യൺ ഡോളർ (300 കോടി ഡോളർ) കമ്പനി സമാഹരിച്ചു. പുതിയ നിക്ഷേപത്തോടെ ദി ബോറിങ് കമ്പനിയുടെ വിപണി മൂല്യം 23 ബില്യൺ ഡോളറായി (2300 കോടി ഡോളർ) ഉയർന്നു.
ദുബായിൽ നടപ്പിലാക്കാൻ തീരുമാനിച്ച ‘ദുബായ് ലൂപ്പ്’ പദ്ധതിക്ക് പുറമെയാണ് യുഎഇയിലുടനീളം വ്യാപിപ്പിക്കുന്ന ഈ വൻകിട ടണൽ പദ്ധതി. ഷമാൽ ഹോൾഡിംഗ്, ഫൈ കാപ്പിറ്റൽ, സെക്വോയ കാപ്പിറ്റൽ, ഹ്യൂമൻ കാപ്പിറ്റൽ, വാലർ ഇക്വിറ്റി പാർട്ണേഴ്സ്, ആൻഡ്രീസെൻ ഹൊറോവിറ്റ്സ്, ടെമാസെക്, ബാരൺ കാപ്പിറ്റൽ എന്നീ പ്രമുഖ ആഗോള നിക്ഷേപ സ്ഥാപനങ്ങളാണ് ഈ ഫണ്ടിംഗ് റൗണ്ടിൽ പങ്കാളികളായത്. യുഎസ്സിലെ ലാസ് വേഗാസിൽ നിലവിൽ വിജയകരമായി പ്രവർത്തിക്കുന്ന ബോറിങ് ലൂപ്പ് സിസ്റ്റം അധിഷ്ഠിതമാക്കിയാണ് യുഎഇയിലും ഹൈസ്പീഡ് ഭൂഗർഭ ഗതാഗത ശൃംഖല ഒരുങ്ങുന്നത്.