ഗ്ലോബൽ വില്ലേജ് ഫുഡ് പാർക്ക് രജിസ്ട്രേഷൻ തീയതി നീട്ടി

ദുബായ് : മേഖലയിലെ ഏറ്റവും വലിയ സാംസ്കാരിക-വിനോദ കേന്ദ്രമായ ദുബായ് ഗ്ലോബൽ വില്ലേജ് (Global Village) വരുന്ന 31-ാം സീസണിലേക്കുള്ള ഭക്ഷണ ശാലകളുടെയും (F&B) കിയോസ്കുകളുടെയും രജിസ്ട്രേഷൻ തീയതി നീട്ടി. സംരംഭകർക്ക് പങ്കാളികളാകാനുള്ള അവസാന അവസരമെന്ന നിലയിൽ സെപ്റ്റംബർ 16 വരെ അപേക്ഷ സമർപ്പിക്കാം. ‘റെസ്റ്റോറന്റ് ആൻഡ് കോഫി ഷോപ്പ്’, ‘കിയോസ്ക് ആൻഡ് ഫുഡ് ട്രോളി’ എന്നീ വിഭാഗങ്ങളിലേക്കാണ് അപേക്ഷകൾ ക്ഷണിച്ചിരിക്കുന്നത്.
സ്വതന്ത്ര ഭക്ഷ്യ ബ്രാൻഡുകൾക്കും പുതിയ സംരംഭകർക്കും ബിസിനസ് വിപുലീകരിക്കാൻ ആഗ്രഹിക്കുന്നവർക്കും മികച്ച പ്ലാറ്റ്‌ഫോമാണ് ഗ്ലോബൽ വില്ലേജ് ഒരുക്കുന്നത്. തെരഞ്ഞെടുക്കപ്പെടുന്ന സംരംഭങ്ങൾക്ക് വിസ നടപടികൾ, കസ്റ്റംസ് ക്ലിയറൻസ്, സ്റ്റോറേജ് സൗകര്യം, ഡിജിറ്റൽ പേയ്‌മെന്റ് ടെർമിനലുകൾ ഉൾപ്പെടെയുള്ള എല്ലാവിധ പിന്തുണയും ഗ്ലോബൽ വില്ലേജ് അധികൃതർ നൽകും. താൽപ്പര്യമുള്ള ബിസിനസുകൾക്ക് ഗ്ലോബൽ വില്ലേജിന്റെ ഔദ്യോഗിക പോർട്ടൽ (business.globalvillage.ae) വഴി സെപ്റ്റംബർ 16-ന് മുൻപായി അപേക്ഷകൾ സമർപ്പിക്കാവുന്നതാണ്.