അബുദാബി : യുഎഇയിൽ 2026 ഒക്ടോബർ മാസത്തേക്കുള്ള ഇന്ധനവില പ്രഖ്യാപിച്ചു. ആഗോള ക്രൂഡോയിൽ വിപണിയിലെ വ്യതിയാനങ്ങളെ തുടർന്ന് ഒക്ടോബർ 1 മുതൽ നിലവിൽ വന്ന പുതിയ നിരക്കുകളിൽ പെട്രോളിനും ഡീസലിനും വർദ്ധനവ് രേഖപ്പെടുത്തി. സൂപ്പർ 98 പെട്രോളിന് ലിറ്ററിന് 4.40 ദിർഹവും (സെപ്റ്റംബറിൽ 3.80 ദിർഹം), സ്പെഷ്യൽ 95 പെട്രോളിന് ലിറ്ററിന് 4.28 ദിർഹവുമാണ് (സെപ്റ്റംബറിൽ 3.69 ദിർഹം) പുതിയ നിരക്ക്. ഈ പ്ലസ് 91 പെട്രോളിന് 4.21 ദിർഹവും (സെപ്റ്റംബറിൽ 3.61 ദിർഹം) ഡീസലിന് ലിറ്ററിന് 4.80 ദിർഹവുമാണ് (സെപ്റ്റംബറിൽ 4.30 ദിർഹം) പുതുക്കിയ വില.
മേഖലയിലെ രാഷ്ട്രീയ അനിശ്ചിതത്വങ്ങളും ചെങ്കടലിലെ എണ്ണക്കപ്പലുകൾക്ക് നേരെയുള്ള ആക്രമണങ്ങളും കാരണം ഈ വർഷം ഫെബ്രുവരി മുതൽ യുഎഇയിൽ ഇന്ധനവിലയിൽ 60 ശതമാനത്തോളം വർദ്ധനവുണ്ടായിരുന്നു. ജൂലൈയിൽ നിരക്കുകളിൽ നേരിയ കുറവ് രേഖപ്പെടുത്തിയെങ്കിലും ഓഗസ്റ്റ്, സെപ്റ്റംബർ, ഒക്ടോബർ മാസങ്ങളിൽ തുടർച്ചയായി വില ഉയരുകയാണ് ചെയ്തത്. പ്രതിമാസ ഇന്ധനവിലയിലുണ്ടാകുന്ന വർദ്ധനവ് രാജ്യത്തെ പ്രവാസികളുടെയും സ്വദേശികളുടെയും കുടുംബ ബജറ്റിനെയും ദൈനംദിന യാത്രാച്ചെലവുകളെയും നേരിട്ട് ബാധിക്കും.