ജിസിസി ഒറ്റ സാമ്പത്തിക ശൃംഖല: നിക്ഷേപ പങ്കാളിത്തത്തിന് ആഹ്വാനവുമായി സെക്രട്ടറി ജനറൽ

ദുബായ് : ജിസിസി രാജ്യങ്ങളെ ആറ് വ്യത്യസ്ത വിപണികളായല്ല, മറിച്ച് പരസ്പരം ബന്ധിപ്പിക്കപ്പെട്ട ഒറ്റ സാമ്പത്തിക വ്യവസ്ഥയായാണ് കാണേണ്ടതെന്ന് ജിസിസി സെക്രട്ടറി ജനറൽ ജാസിം അൽ ബുദൈവി. ദുബായ് വേൾഡ് ട്രേഡ് സെന്ററിൽ നടന്ന 15-ാമത് എഐഎം കോൺഗ്രസിൽ (AIM Congress) മുഖ്യപ്രഭാഷണം നടത്തുകയായിരുന്നു അദ്ദേഹം. ഏതെങ്കിലും ഒരു ജിസിസി രാജ്യത്ത് നടത്തുന്ന നിക്ഷേപം കേവലം ഒരു ദേശീയ വിപണിയിൽ മാത്രമല്ല, മറിച്ച് ആഗോളതലത്തിലേക്ക് തുറക്കപ്പെടുന്ന വിപുലമായ പ്രാദേശിക നിക്ഷേപ ശൃംഖലയിലേക്കുള്ള വാതിലാണെന്നും അദ്ദേഹം പറഞ്ഞു.
ലോകത്തിലെ ഏറ്റവും വലിയ പത്ത് സാമ്പത്തിക ശക്തികളിൽ ഒന്നായ ജിസിസിയുടെ ആകെ ആഭ്യന്തര ഉൽപ്പാദനം (GDP) 2.4 ട്രില്യൺ ഡോളർ കവിഞ്ഞതായി അദ്ദേഹം വ്യക്തമാക്കി. ജിസിസി രാജ്യങ്ങളിലെ സോവറിൻ വെൽത്ത് ഫണ്ടുകളുടെ ആസ്തി 5 ട്രില്യൺ ഡോളറിലധികവും commercial ബാങ്ക് ആസ്തികൾ 3.9 ട്രില്യൺ ഡോളറുമാണ്. 2025-ൽ ജിസിസിയിലേക്ക് ഒഴുകിയെത്തിയ ആകെ നേരിട്ടുള്ള വിദേശനിക്ഷേപം (FDI) 792.7 ബില്യൺ ഡോളറിലെത്തി, ഇതിൽ 171.4 ബില്യൺ ഡോളറും ജിസിസി രാജ്യങ്ങൾ തമ്മിലുള്ള ആഭ്യന്തര നിക്ഷേപങ്ങളാണെന്നും മേഖലയിലെ സാമ്പത്തിക ഭദ്രതയും പരസ്പര സഹകരണവുമാണ് ഇതിന് കാരണമെന്നും അദ്ദേഹം കൂട്ടിച്ചേർത്തു.