ദുബായിൽ കെട്ടിടങ്ങളുടെ ഗുണനിലവാര-സുരക്ഷാ സർട്ടിഫിക്കറ്റിന് കാലാവധി നിശ്ചയിച്ച് ദുബായ് മുൻസിപ്പാലിറ്റി

ദുബായ് : ദുബായിലെ കെട്ടിടങ്ങളുടെ സുരക്ഷയും ഗുണനിലവാരവും ഉറപ്പാക്കുന്ന ‘ബിൽഡിംഗ് ക്വാളിറ്റി ആൻഡ് സേഫ്റ്റി സർട്ടിഫിക്കറ്റിന്റെ’ (Building Quality and Safety Certificate) കാലാവധി പ്രഖ്യാപിച്ച് ദുബായ് മുൻസിപ്പാലിറ്റി. നിർമ്മാണം പൂർത്തിയായി 20 മുതൽ 40 വർഷം വരെ പഴക്കമുള്ള കെട്ടിടങ്ങൾക്ക് 10 വർഷവും, 40 വർഷത്തിലധികം പഴക്കമുള്ള കെട്ടിടങ്ങൾക്ക് 5 വർഷവുമാണ് സർട്ടിഫിക്കറ്റ് കാലാവധി നിശ്ചയിച്ചിരിക്കുന്നത്. സർട്ടിഫിക്കറ്റ് പുതുക്കുന്നതിനുള്ള അപേക്ഷകൾ കാലാവധി പൂർത്തിയാകുന്നതിന് 90 ദിവസങ്ങൾക്ക് മുൻപ് സമർപ്പിക്കണം.
എമിറേറ്റിലെ എല്ലാ കെട്ടിട ഉടമകൾക്കും, ഓണേഴ്സ് അസോസിയേഷൻ കമ്മിറ്റികൾക്കും, എഞ്ചിനീയറിംഗ് കൺസൾട്ടൻസികൾക്കും മുൻസിപ്പാലിറ്റി സർക്കുലർ അയച്ചു. 2026-ലെ 3-ാം നമ്പർ ബിൽഡിംഗ് ക്വാളിറ്റി ആൻഡ് സേഫ്റ്റി നിയമത്തിന്റെ അടിസ്ഥാനത്തിലാണ് നടപടി. നിർമ്മാണം പൂർത്തിയായി 20 വർഷത്തിൽ കൂടുതൽ പഴക്കമുള്ള കെട്ടിടങ്ങളുടെ സ്ട്രക്ചറൽ സുരക്ഷ, ഫ്രണ്ട് ഗ്ലാസ് വിൻഡോകൾ, സിവിൽ ഡിഫൻസ്, സിറ (SIRA) സുരക്ഷാ സംവിധാനങ്ങൾ തുടങ്ങിയവ അംഗീകൃത എഞ്ചിനീയറിംഗ് കൺസൾട്ടൻസികൾ പരിശോധിച്ച് സാക്ഷ്യപ്പെടുത്തണം. 40 വർഷത്തിലധികം പഴക്കമുള്ള ബഹുനില കെട്ടിടങ്ങൾക്കാണ് ആദ്യ ഘട്ടത്തിൽ സർട്ടിഫിക്കറ്റ് നിർബന്ധമാക്കുന്നത്.