അബുദാബി: വാട്ട്‌സ്ആപ്പിലൂടെ യുവാവിനെ ചീത്തവിളിക്കുകയും ഭീഷണിപ്പെടുത്തുകയും ചെയ്ത കേസിൽ യുവതി പരാതിക്കാരന് 5,000 ദിർഹം നഷ്ടപരിഹാരം നൽകാൻ അബുദാബി ഫാമിലി, സിവില്‍ ആൻഡ് അഡ്മിനിസ്ട്രേറ്റീവ് കോർട്ട് ഉത്തരവിട്ടു. മാനസികവും സാമ്പത്തികവുമായ ബുദ്ധിമുട്ടുകൾ ഉണ്ടാക്കിയതിനാണ് ഈ നടപടി. നേരത്തെ ക്രിമിനൽ കോടതി ഇതേ കേസിൽ യുവതിക്ക് 10,000 ദിർഹം പിഴ ചുമത്തുകയും, ഫോൺ നമ്പറും വാട്ട്‌സ്ആപ്പ് അക്കൗണ്ടും റദ്ദാക്കി മൂന്ന് മാസത്തേക്ക് ഇന്റർനെറ്റ് ഉപയോഗിക്കുന്നതിന് വിലക്കേർപ്പെടുത്തുകയും ചെയ്തിരുന്നു.
തനിക്കുണ്ടായ ബുദ്ധിമുട്ടുകൾക്ക് 20,000 ദിർഹം നഷ്ടപരിഹാരം വേണമെന്നാവശ്യപ്പെട്ടാണ് യുവാവ് സിവില്‍ കോടതിയെ സമീപിച്ചത്. പോലീസിലും പബ്ലിക് പ്രോസിക്യൂഷനിലും പരാതി നൽകാൻ ചെലവായ തുകയും കേസ് മൂലമുണ്ടായ മാനസിക വിഷമങ്ങളും കണക്കിലെടുത്താണ് സിവില്‍ കോടതി 5,000 ദിർഹം നഷ്ടപരിഹാരവും കേസിന്റെ കോടതിച്ചെലവുകളും യുവതി വഹിക്കണമെന്ന് വിധി പ്രസ്താവിച്ചത്. സാങ്കേതികവിദ്യ ഉപയോഗിച്ചുള്ള ഭീഷണികളും അധിക്ഷേപങ്ങളും യുഎഇ നിയമപ്രകാരം ഗുരുതരമായ കുറ്റകൃത്യമാണ്.
17