അബുദാബി : ജപ്പാന്റെ പരമ്പരാഗത കായിക ഇനമായ സുമൊ (Sumo) ഗുസ്തിയുടെ ആദ്യ അന്താരാഷ്ട്ര മത്സരം യു.എ.ഇയിൽ നടക്കുന്നു. അബുദാബിയിലെ സ്പേസ്42 അരീനയിൽ (Space42 Arena) സെപ്റ്റംബർ 26-നാണ് ‘ഓൾ-സ്റ്റാർ സുമൊ കോംപറ്റീഷൻ’ (All-Star Sumo Competition) അരങ്ങേറുന്നത്.
ജപ്പാൻ, മംഗോളിയ, ഈജിപ്ത് എന്നീ രാജ്യങ്ങളിൽ നിന്നുള്ള മുൻനിരക്കാരായ ഒൻപത് സുമൊ യോദ്ധാക്കൾ (Wrestlers) ടൂർണമെന്റിൽ മാറ്റുരയ്ക്കും. പ്രശസ്തമായ എംപറർസ് കപ്പ് (Emperor’s Cup) വിജയിച്ച ജപ്പാന്റെ ‘ഇച്ചി’, ഈജിപ്തിന്റെ ചാമ്പ്യൻ റാമി എൽ-ഗസാർ, മുൻ വേൾഡ് ജൂനിയർ ചാമ്പ്യനായ മംഗോളിയയുടെ ‘മെൻഡി’ തുടങ്ങി പ്രമുഖ താരങ്ങൾ അബുദാബിയിലെത്തും. മത്സരങ്ങൾക്ക് പുറമെ നൂറ്റാണ്ടുകൾ പഴക്കമുള്ള സുമൊ കായികവിഭാഗത്തിന്റെ പരമ്പരാഗത ചടങ്ങുകൾ നേരിട്ട് കാണാനുള്ള അവസരവും കാണികൾക്ക് ലഭിക്കും. ‘യു.എസ്.എ സുമൊ’യുമായി സഹകരിച്ചാണ് പരിപാടി സംഘടിപ്പിക്കുന്നത്.