അൽ നസറിനെ 4-0 ന് തകർത്ത് അൽ ഐൻ

അൽ ഐൻ : ക്രിസ്റ്റ്യാനോ റൊണാൾഡോ ഉൾപ്പെടെയുള്ള വമ്പൻ താരനിരയുമായി എത്തിയ സൗദി ക്ലബ് അൽ നസറിനെ തകർത്തുവിട്ട് യുഎഇ ക്ലബ്ബ് അൽ ഐൻ. എഎഫ്സി ചാമ്പ്യൻസ് ലീഗ് എലൈറ്റിന്റെ (AFC Champions League Elite) ഉദ്ഘാടന മത്സരത്തിലാണ് എതിരില്ലാത്ത നാല് ഗോളുകൾക്ക് അൽ ഐൻ വമ്പൻ വിജയം സ്വന്തമാക്കിയത്. അൽ ഐനിലെ ഹസ്സ ബിൻ സായിദ് സ്റ്റേഡിയത്തിൽ നടന്ന പോരാട്ടത്തിൽ എല്ലാ അർത്ഥത്തിലും അൽ നസറിനെ നിഷ്പ്രഭരാക്കുന്ന പ്രകടനമാണ് ആതിഥേയർ പുറത്തെടുത്തത്.
മുമ്പ് അൽ നസറിന് കടുത്ത ഭീഷണി ഉയർത്തിയ അൽ ഐന്റെ സൂപ്പർ താരം സുഫിയാൻ റഹീമി (Soufiane Rahimi) തന്നെയാണ് ഇത്തവണയും റൊണാൾഡോയുടെയും ടീമിന്റെയും വില്ലനായത്. മികച്ച ആക്രമണ ശൈലിയുമായി കളം നിറഞ്ഞ അൽ ഐന് മുന്നിൽ റൊണാൾഡോയ്ക്കും സഹതാരങ്ങൾക്കും അവസരങ്ങൾ മുതലാക്കാനായില്ല. സ്വന്തം കാണികൾക്ക് മുന്നിൽ ഏകപക്ഷീയമായ നാല് ഗോളുകളുടെ മിന്നുന്ന ജയത്തോടെ അൽ ഐൻ ചാമ്പ്യൻസ് ലീഗ് പ്രചാരണത്തിന് ഗംഭീര തുടക്കം കുറിച്ചു.