ബ്രസീലിയൻ എയ്‌റോസ്‌പേസ് കമ്പനിയായ ‘അകായർ’ ഇനി യുഎഇയുടെ എഡ്ജ് ഗ്രൂപ്പിന് സ്വന്തം

അബുദാബി : യുഎഇയുടെ പ്രമുഖ പ്രതിരോധ-അത്യാധുനിക സാങ്കേതികവിദ്യ ഗ്രൂപ്പായ ‘എഡ്ജ്’ (EDGE), പ്രമുഖ ബ്രസീലിയൻ എയ്‌റോസ്‌പേസ് എഞ്ചിനീയറിംഗ് കമ്പനിയായ ‘അകായറിന്റെ’ (AKAER) 100 ശതമാനം ഓഹരികളും സ്വന്തമാക്കാൻ കരാറിലേർപ്പെട്ടു. യുഎഇയുടെ രാജ്യാന്തര സാന്നിധ്യം ശക്തമാക്കുന്നതിനും ബഹിരാകാശ-പ്രതിരോധ എഞ്ചിനീയറിംഗ് രംഗത്തെ ശേഷി വിപുലീകരിക്കുന്നതിനുമാണ് ഈ വൻ ഏറ്റെടുക്കൽ.
1992-ൽ സ്ഥാപിതമായ അകായർ, മിലിട്ടറി-കൊമേഴ്‌സ്യൽ വിമാനങ്ങൾക്കായുള്ള എഞ്ചിനീയറിംഗ് സൊല്യൂഷനുകൾ നൽകുന്നതിൽ മൂന്ന് പതിറ്റാണ്ടിലധികം പരിചയസമ്പത്തുള്ള കമ്പനിയാണ്. സാബ് ഗ്രിപെൻ എൻജി (Saab Gripen NG), ബോയിംഗ് 747-8 തുടങ്ങിയ പ്രമുഖ വിമാനങ്ങളുടെ നിർമ്മാണ പ്രോജക്ടുകളിൽ ഇവർ പങ്കാളികളായിട്ടുണ്ട്. ഏറ്റെടുക്കലിന് ശേഷവും അകായർ ബ്രസീലിൽ നിന്ന് തന്നെയായിരിക്കും പ്രവർത്തനം തുടരുകയെന്നും പ്രാദേശിക ഭരണത്തിലും ഉപഭോക്തൃ ബന്ധങ്ങളിലും മാറ്റമുണ്ടാകില്ലെന്നും എഡ്ജ് ഗ്രൂപ്പ് സിഇഒ ഹമദ് അൽ മരാർ വ്യക്തമാക്കി.