​സൗദി വിമാനത്താവളത്തിന് നേരെ മിസൈൽ ആക്രമണം; ദുബായ്, ഷാർജ സർവീസുകൾ മുടങ്ങി; ആശങ്കയിൽ യാത്രക്കാർ

ദുബായ്: സൗദി അറേബ്യയിലെ അബഹ അന്താരാഷ്ട്ര വിമാനത്താവളത്തിന് നേരെയുണ്ടായ ആക്രമണത്തെത്തുടർന്ന് ദുബായിൽ നിന്നും ഷാർജയിൽ നിന്നും അബഹയിലേക്കുള്ള വിമാന സർവീസുകൾ റദ്ദാക്കി. അബഹ വിമാനത്താവളത്തിലെ സുരക്ഷാ സാഹചര്യങ്ങൾ മുൻനിർത്തിയാണ് ഫ്ലൈദുബായ്, എയർ അറേബ്യ തുടങ്ങിയ പ്രമുഖ എയർലൈനുകൾ അവിടേക്കുള്ള യാത്രകൾ താൽക്കാലികമായി നിർത്തിവെച്ചത്. ആക്രമണത്തിന്റെ പശ്ചാത്തലത്തിൽ വിമാനത്താവളത്തിന്റെ പ്രവർത്തനം താത്കാലികമായി തടസ്സപ്പെട്ടതോടെ നിശ്ചയിച്ചിരുന്ന പല സർവീസുകളും റദ്ദാക്കേണ്ടി വന്നു. സുരക്ഷാ കാരണങ്ങളാൽ വിമാനങ്ങൾ റദ്ദാക്കേണ്ടി വന്നതിൽ ഖേദമുണ്ടെന്നും, യാത്രക്കാർ തങ്ങളുടെ ഫ്ലൈറ്റ് സ്റ്റാറ്റസ് അതത് എയർലൈനുകളുടെ ഔദ്യോഗിക വെബ്സൈറ്റുകളിലൂടെയോ കസ്റ്റമർ കെയർ വഴിയോ മുൻകൂട്ടി പരിശോധിച്ച് ഉറപ്പുവരുത്തണമെന്നും അധികൃതർ നിർദ്ദേശിച്ചു. മേഖലയിൽ തുടരുന്ന സംഘർഷാവസ്ഥ കണക്കിലെടുത്ത് വിമാന സർവീസുകളിൽ ഇനിയും മാറ്റങ്ങൾ ഉണ്ടാകാൻ സാധ്യതയുള്ളതിനാൽ യാത്രക്കാർ അതീവ ജാഗ്രത പുലർത്തണമെന്നും എയർലൈൻ അധികൃതർ അറിയിച്ചു.