ഹോർമുസ് ഇടുക്കിലെ ഒമാൻ സമുദ്രപരിധിയിലൂടെ സഞ്ചരിക്കുകയായിരുന്ന യു.എ.ഇയുടെ രണ്ട് എണ്ണക്കപ്പലുകൾക്ക് നേരെ ഇറാൻ നടത്തിയ മിസൈൽ ആക്രമണത്തിൽ കപ്പലിലെ ജീവനക്കാരനായ ഇന്ത്യൻ സ്വദേശി കൊല്ലപ്പെടുകയും എട്ടുപേർക്ക് പരിക്കേൽക്കുകയും ചെയ്തു. യു.എ.ഇ ദേശീയ എണ്ണക്കപ്പലുകളായ ‘മൊംബാസ’ (Mombasa), ‘അൽ ബഹിയ്യ’ (Al Bahiyah) എന്നിവയ്ക്ക് നേരെയാണ് ഇറാന്റെ ക്രൂസ് മിസൈൽ ആക്രമണമുണ്ടായതെന്ന് യു.എ.ഇ പ്രതിരോധ മന്ത്രാലയം സ്ഥിരീകരിച്ചു. ‘മൊംബാസ’ കപ്പലിലെ ജീവനക്കാരനായ ഇന്ത്യക്കാരനാണ് കൊല്ലപ്പെട്ടത്. പരിക്കേറ്റ എട്ടുപേരിൽ ആറ് ഇന്ത്യക്കാരും രണ്ട് യുക്രെയ്ൻ സ്വദേശികളും ഉൾപ്പെടുന്നു; ഇതിൽ നാലുപേരുടെ പരിക്ക് അതീവ ഗുരുതരമാണ്. മിസൈൽ പതിച്ചതിനെത്തുടർന്ന് ഇരു കപ്പലുകളിലും വൻ തീപിടിത്തമുണ്ടായെങ്കിലും കപ്പലിലെ ജീവനക്കാർക്ക് ഇത് ഉടൻ തന്നെ നിയന്ത്രണവിധേയമാക്കാൻ കഴിഞ്ഞു. അന്താരാഷ്ട്ര നിയമങ്ങളുടെ നഗ്നമായ ലംഘനമാണ് ഇറാൻ നടത്തിയതെന്നും കപ്പലുകൾക്ക് നേരെയുണ്ടായ ഈ വഞ്ചനാപരമായ ആക്രമണത്തിന് തക്കതായ മറുപടി നൽകാൻ യു.എ.ഇക്ക് പൂർണ്ണ അവകാശമുണ്ടെന്നും വിദേശകാര്യ മന്ത്രാലയം പ്രസ്താവനയിലൂടെ മുന്നറിയിപ്പ് നൽകി. മേഖലയിലെ സുരക്ഷയും കപ്പൽ ഗതാഗത സ്വാതന്ത്ര്യവും ഉറപ്പാക്കാൻ സാധ്യമായ എല്ലാ നടപടികളും സ്വീകരിക്കുമെന്നും യു.എ.ഇ അറിയിച്ചിട്ടുണ്ട്.
63