എഐ അധിഷ്ഠിത സ്മാർട്ട് ഗതാഗതത്തിനായി ചൈനീസ് കമ്പനികളുമായി കൈകോർത്ത് ദുബായ് ആർടിഎ

ദുബായ് : നിർമ്മിത ബുദ്ധി (AI), ഡിജിറ്റൽ പരിവർത്തനം, ആധുനിക ഗതാഗത സാങ്കേതികവിദ്യകൾ എന്നിവ നടപ്പിലാക്കുന്നതിനായി പ്രമുഖ ചൈനീസ് കമ്പനികളുമായി തന്ത്രപരമായ പങ്കാളിത്തം വിപുലീകരിച്ച് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA). ആർടിഎ ഡയറക്ടർ ജനറൽ മത്തർ അൽ തായറുടെ നേതൃത്വത്തിലുള്ള ഉന്നതതല സംഘം ചൈന സന്ദർശിച്ചാണ് ഇതുസംബന്ധിച്ച കരാറുകളിൽ ഒപ്പുവെച്ചത്. റെയിൽവേ നിയന്ത്രണ സംവിധാനങ്ങളിൽ വിദഗ്ധരായ ‘കാസ്കോ സിഗ്നൽ’ (CASCO SIGNAL LTD), പ്രമുഖ ടെക്നോളജി കമ്പനിയായ ‘ഹുവായ്’ (Huawei) എന്നിവയുമായാണ് ആർടിഎ ധാരണാപത്രങ്ങളിൽ ഒപ്പുവെച്ചത്.
കരാറിന്റെ ഭാഗമായി ദുബായ് മെട്രോ ബ്ലൂ ലൈൻ ഉൾപ്പെടെയുള്ള ഭാവി മെട്രോ പ്രോജക്റ്റുകളെ പിന്തുണയ്ക്കുന്നതിനായി ദുബായിൽ അത്യാധുനിക ഗവേഷണ-വികസന കേന്ദ്രവും ഇന്നൊവേഷൻ ലബോറട്ടറിയും സ്ഥാപിക്കും. കൂടാതെ ഹുവായുമായുള്ള സഹകരണത്തിലൂടെ ട്രാഫിക് മാനേജ്‌മെന്റ്, തത്സമയ അപകട കണ്ടെത്തൽ സംവിധാനങ്ങൾ, ദുബായുടെ ’20-മിനിറ്റ് സിറ്റി’ പദ്ധതി എന്നിവയ്ക്കായി എഐ സാങ്കേതികവിദ്യകൾ വികസിപ്പിക്കും. സന്ദർശനത്തിന്റെ ഭാഗമായി ലോകത്തിലെ ഏറ്റവും വേഗതയേറിയ ഷാങ്ഹായ് മാഗ്ലേവ് ട്രെയിനിലും ദുബായ് സംഘം യാത്ര ചെയ്തു.