നവി മുംബൈയിൽ നിന്ന് അബുദാബിയിലേക്ക് നേരിട്ട് വിമാന സർവീസുമായി എയർ ഇന്ത്യ എക്സ്പ്രസ്

ദുബായ് : മഹാരാഷ്ട്രയിലെ ഏറ്റവും പുതിയ വിമാനത്താവളമായ നവി മുംബൈ ഇന്റർനാഷണൽ എയർപോർട്ടിൽ നിന്നുള്ള ആദ്യ അന്താരാഷ്ട്ര വിമാന സർവീസ് പ്രഖ്യാപിച്ച് എയർ ഇന്ത്യ എക്സ്പ്രസ്. ജൂലൈ 15 മുതൽ നവി മുംബൈയിൽ നിന്നും യുഎഇ തലസ്ഥാനമായ അബുദാബിയിലേക്ക് വിമാനം നേരിട്ട് സർവീസ് നടത്തും. തുടക്കത്തിൽ ബുധൻ, വെള്ളി ദിവസങ്ങളിൽ ആഴ്ചയിൽ രണ്ട് സർവീസുകളാകും ഉണ്ടാവുക. പിന്നീട് ജൂലൈ 29 മുതൽ ഞായറാഴ്ചകളിലെ സർവീസ് കൂടി ഉൾപ്പെടുത്തി ഇത് ആഴ്ചയിൽ മൂന്നായി ഉയർത്തും. മുംബൈ മെട്രോപൊളിറ്റൻ മേഖലയിലുള്ളവർക്കും യുഎഇയിലെ പ്രവാസി മലയാളികൾ ഉൾപ്പെടെയുള്ള ഇന്ത്യൻ സമൂഹത്തിനും നാട്ടിലേക്ക് യാത്ര ചെയ്യാൻ ഈ പുതിയ റൂട്ട് കൂടുതൽ എളുപ്പവഴിയൊരുക്കും. പുതിയ സർവീസ് ആരംഭിക്കുന്നതോടെ നവി മുംബൈയിൽ നിന്ന് അബുദാബി, ബെംഗളൂരു, ഡൽഹി എന്നിവിടങ്ങളിലേക്ക് എയർ ഇന്ത്യ എക്സ്പ്രസിന് ആകെ 30 പ്രതിവാര സർവീസുകളാകും ഉണ്ടാകുക.