ദുരന്തങ്ങൾ മുൻകൂട്ടി പ്രവചിക്കാൻ എഐ സംവിധാനവുമായി യുഎഇ

അബുദാബി : ആഗോളതലത്തിൽ ഉണ്ടാകുന്ന പ്രകൃതിദുരന്തങ്ങളും മാനുഷിക പ്രതിസന്ധികളും മുൻകൂട്ടി പ്രവചിക്കാനും തടയാനും ആർട്ടിഫിഷ്യൽ ഇന്റലിജൻസ് (എഐ) സാങ്കേതികവിദ്യ അടിസ്ഥാനമാക്കിയുള്ള ആഗോള കേന്ദ്രം ആരംഭിക്കാൻ യുഎഇ ഒരുങ്ങുന്നു. ദുരന്തങ്ങൾ സംഭവിച്ചതിന് ശേഷം സഹായമെത്തിക്കുന്ന പരമ്പരാഗത രീതിക്ക് പകരം, അത് മുൻകൂട്ടി കണ്ട് പ്രതിരോധ നടപടികൾ സ്വീകരിക്കാൻ ഈ കേന്ദ്രം വഴി സാധിക്കും.
പ്രസിഡൻഷ്യൽ കോർട്ട് വികസന കാര്യ ഓഫീസ് അബുദാബിയിലെ സായിദ് നാഷണൽ മ്യൂസിയത്തിൽ സംഘടിപ്പിച്ച യോഗത്തിലാണ് ഇതുസംബന്ധിച്ച ചർച്ചകൾ നടന്നത്. ദുരന്ത ബാധിത പ്രദേശങ്ങളിലെ യഥാർത്ഥ വിവരങ്ങൾ കൃത്യസമയത്ത് ലഭ്യമാകാത്തത് രക്ഷാപ്രവർത്തനത്തെ ബാധിക്കാറുണ്ടെന്നും എഐ ഉപയോഗിക്കുന്നതിലൂടെ വിവരങ്ങൾ വിശകലനം ചെയ്യാനുള്ള സമയം രണ്ടോ മൂന്നോ ദിവസങ്ങളിൽ നിന്ന് ഒന്നോ രണ്ടോ മണിക്കൂറായി ചുരുക്കാൻ സാധിക്കുമെന്നും എമിറേറ്റ്സ് റെഡ് ക്രസന്റ് അധികൃതർ വ്യക്തമാക്കി. ഡാറ്റയും സാങ്കേതികവിദ്യയും ഏകോപിപ്പിച്ച് ദുരന്ത നിവാരണ രംഗത്ത് അന്താരാഷ്ട്ര തലത്തിൽ വലിയ മാറ്റം കൊണ്ടുവരാനാണ് യുഎഇ ലക്ഷ്യമിടുന്നത്.