അബുദാബി : രാജ്യത്ത് ഡ്രൈവർലെസ്സ് വാഹനങ്ങളുടെ ഉപയോഗവും പരിശോധനയും നിയന്ത്രിക്കുന്നതിനുള്ള പുതിയ ഫെഡറൽ നിയമത്തിന് യുഎഇ മന്ത്രിസഭ അംഗീകാരം നൽകി. അബുദാബി ഖസർ അൽ വത്താനിൽ യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് ചരിത്രപരമായ ഈ തീരുമാനം എടുത്തത്. സ്വയം ഓടിക്കുന്ന വാഹനങ്ങളുടെ പരിശോധന, രജിസ്ട്രേഷൻ, ലൈസൻസിംഗ് എന്നിവയ്ക്കുള്ള കൃത്യമായ മാനദണ്ഡങ്ങൾ നിയമം അനുശാസിക്കുന്നു. ഒപ്പം വാഹന നിർമ്മാതാക്കൾ, ഓപ്പറേറ്റർമാർ, യാത്രക്കാർ എന്നിവരുടെ ചുമതലകളും ഫെഡറൽ-ലോക്കൽ അതോറിറ്റികളുടെ അധികാരപരിധിയും പുതിയ നിയമം വ്യക്തമാക്കുന്നുണ്ട്.
റോഡപകടങ്ങൾ കുറയ്ക്കാനും ഗതാഗതക്കുരുക്കും അന്തരീക്ഷ മലിനീകരണവും ഒഴിവാക്കാനും ലക്ഷ്യമിട്ടാണ് ഏഴ് എമിറേറ്റുകൾക്കും ബാധകമാകുന്ന ഏകീകൃത നിയമ നിർമ്മാണം യുഎഇ നടപ്പിലാക്കിയിരിക്കുന്നത്. 2030-ഓടെ നഗരത്തിലെ ആകെ യാത്രകളുടെ 25 ശതമാനവും ഡ്രൈവറില്ലാ വാഹനങ്ങളിലാക്കുക എന്ന ലക്ഷ്യത്തോടെ ദുബായിൽ ഇതിനകം 100 സ്വയം ഓടിക്കുന്ന ടാക്സികളുടെ ഔദ്യോഗിക പ്രവർത്തനം ആരംഭിച്ചിരുന്നു. ഉമ്മു സുഖീം, ജുമൈറ തുടങ്ങിയ മേഖലകളിൽ ഊബർ ആപ്പ് വഴി ഡ്രൈവറില്ലാ അപ്പോളോ ഗോ (Apollo Go) വാഹനങ്ങൾ ലഭ്യമാക്കിത്തുടങ്ങിയ പശ്ചാത്തലത്തിൽ, പുതിയ ഫെഡറൽ നിയമം യുഎഇയിലെ ഗതാഗത മേഖലയിൽ വൻ വിപ്ലവത്തിന് വഴിതുറക്കും.