സ്വകാര്യ എഐ ആപ്പുകൾ ജോലിക്ക് ഉപയോഗിക്കുന്നവരാണോ?

അബുദാബി : സ്ഥാപനങ്ങളുടെ അനുമതിയില്ലാതെ ജീവനക്കാർ സ്വന്തം നിലയ്ക്ക് വ്യക്തിഗത ആർട്ടിഫിഷ്യൽ ഇന്റലിജൻസ് (AI) ആപ്പുകൾ തൊഴിലാവശ്യങ്ങൾക്ക് ഉപയോഗിക്കുന്ന ‘ഷാഡോ എഐ’ (Shadow AI) പ്രവണത യുഎഇയിലെ കോർപ്പറേറ്റ് മേഖലയ്ക്ക് വൻ സുരക്ഷാ-നിയമ ഭീഷണിയാകുന്നതായി വിദഗ്ദ്ധരുടെ മുന്നറിയിപ്പ്. ജോലി വേഗത്തിലാക്കാനും ഉൽപ്പാദനക്ഷമത കൂട്ടാനും ജീവനക്കാർ ഇത്തരം ആപ്പുകൾ ഉപയോഗിക്കുന്നുണ്ടെങ്കിലും, സ്ഥാപനങ്ങളുടെ രഹസ്യ വിവരങ്ങളും ഡാറ്റകളും ചോരാൻ ഇത് വഴിവെക്കുന്നു.
മൈക്രോസോഫ്റ്റും ലിങ്ക്ഡ്ഇനും നടത്തിയ പഠനമനുസരിച്ച് 78% എഐ ഉപയോക്താക്കളും സ്വന്തം എഐ ടൂളുകളാണ് ജോലിസ്ഥലത്ത് ഉപയോഗിക്കുന്നത്. കരാറുകൾ തയാറാക്കാനും റിപ്പോർട്ടുകൾ ചുരുക്കാനും ഡാറ്റ വിശകലനം ചെയ്യാനും ജീവനക്കാർ അങ്കീകാരമില്ലാത്ത പ്ലാറ്റ്‌ഫോമുകൾ ഉപയോഗിക്കുന്നത് ഡാറ്റ സംരക്ഷണ നിയമങ്ങളുടെ ലംഘനമാണ്. സ്ഥാപനത്തിന്റെ രഹസ്യ സ്വഭാവമുള്ള വിവരങ്ങൾ പുറത്തുവിട്ടാൽ ജീവനക്കാർക്ക് ജോലി നഷ്ടപ്പെടാനും 6 മാസം വരെ തടവും 2 ലക്ഷം മുതൽ 10 ലക്ഷം ദിർഹം വരെ പിഴയും ലഭിക്കാനും യുഎഇ നിയമപ്രകാരം സാധ്യതയുണ്ട്.