അബുദാബി : ഭക്ഷ്യസുരക്ഷാ മാനദണ്ഡങ്ങൾ ലംഘിച്ചതിനെ തുടർന്ന് അൽ ഐനിലെ കഫറ്റീരിയ അബുദാബി കൃഷി, ഭക്ഷ്യസുരക്ഷാ അതോറിറ്റി (ADAFSA) അടപ്പിച്ചു. അൽ ഐൻ സിറ്റി അൽ ജിമി ഏരിയയിലുള്ള ‘ജസ്റ്റ് ചില്ലി കഫറ്റീരിയ’ക്ക് (JUST CHILLY CAFETERIA – L.L.C – O.P.C) എതിരെയാണ് അതോറിറ്റി അഡ്മിനിസ്ട്രേറ്റീവ് ക്ലോഷർ ഉത്തരവ് പുറപ്പെടുവിച്ചത്.
തുടർച്ചയായി ഭക്ഷ്യസുരക്ഷാ നിയമങ്ങൾ ലംഘിക്കുകയും, അതോറിറ്റി നിർദ്ദേശിച്ച തിരുത്തൽ നടപടികൾ നടപ്പിലാക്കുന്നതിൽ പരാജയപ്പെടുകയും ചെയ്ത സാഹചര്യത്തിലാണ് ഉപഭോക്താക്കളുടെ ആരോഗ്യം മുൻനിർത്തി കഫറ്റീരിയ ഉടനടി അടപ്പിക്കാൻ അതോറിറ്റി തീരുമാനിച്ചത്. വീഴ്ചകൾ പൂർണ്ണമായും പരിഹരിച്ച് ആവശ്യമായ എല്ലാ മാനദണ്ഡങ്ങളും പാലിച്ചാൽ മാത്രമേ സ്ഥാപനത്തിന് ഇനി തുറന്നുപ്രവർത്തിക്കാൻ അനുമതി നൽകുകയുള്ളൂ എന്ന് അതോറിറ്റി വ്യക്തമാക്കി. കഴിഞ്ഞ ആഴ്ചകളിൽ സമാനമായ ലംഘനങ്ങളെ തുടർന്ന് അബുദാബി സായിദ് പോർട്ടിലെ ഗലേറിയ കഫേ, അൽ ദൊമ്യാതി സ്നാക്സ് എന്നീ റെസ്റ്റോറന്റുകളും അതോറിറ്റി അടപ്പിച്ചിരുന്നു. യുഎഇയിലെ ഭക്ഷ്യസ്ഥാപനങ്ങളിൽ കൃത്യമായ പരിശോധനകൾ തുടരുമെന്നും, എന്തെങ്കിലും ലംഘനങ്ങൾ ശ്രദ്ധയിൽപ്പെട്ടാൽ അബുദാബി ഗവൺമെന്റിന്റെ 800555 എന്ന ടോൾ ഫ്രീ നമ്പറിൽ ബന്ധപ്പെട്ട് വിവരമറിയിക്കണമെന്നും പൊതുജനങ്ങളോട് അതോറിറ്റി അഭ്യർത്ഥിച്ചു.