ഗാസയിലെ യുഎഇ ഫീൽഡ് ആശുപത്രി സന്ദർശിച്ച് യുഎൻ പ്രതിനിധി സംഘം

ഗാസ : ഗാസ സ്ട്രിപ്പിൽ പ്രവർത്തിക്കുന്ന യുഎഇ ഫീൽഡ് ആശുപത്രിയിൽ യുണൈറ്റഡ് നേഷൻസിന്റെ (UN) ഉന്നതതല പ്രതിനിധി സംഘം സന്ദർശനം നടത്തി. യുഎൻ ഓഫീസ് ഫോർ ദി കോർഡിനേഷൻ ഓഫ് ഹ്യുമാനിറ്റേറിയൻ അഫയേഴ്സ് (OCHA), ഫലസ്തീനിലെ യുഎൻ റസിഡന്റ് കോർഡിനേറ്റർ ഓഫീസ് എന്നിവയിൽ നിന്നുള്ള ഉദ്യോഗസ്ഥരാണ് ആശുപത്രിയിലെത്തിയത്. യുഎഇ ഇവിടെ നൽകിവരുന്ന മികച്ച ചികിൽസാ സൗകര്യങ്ങളെയും മാനുഷിക സഹായങ്ങളെയും സംഘം വിലയിരുത്തി.
യുഎൻ റസിഡന്റ് ആൻഡ് ഹ്യുമാനിറ്റേറിയൻ കോർഡിനേറ്റർ ഡോ. രാമീസ് അലക്ബറോവ്, ഡെപ്യൂട്ടി കോർഡിനേറ്റർ സൂസൻ ത്കാലെക്, ഗാസയിലെ ഒസിഎച്ച്എ (OCHA) ഓഫീസ് മേധാവി താഹെർ ഇബ്രാഹിം എന്നിവരടങ്ങുന്ന സംഘമാണ് സന്ദർശനം നടത്തിയത്. ആശുപത്രിയിലെ വിവിധ വാർഡുകളും അത്യാധുനിക സജ്ജീകരണങ്ങളും കണ്ട സംഘം യുഎഇ മെഡിക്കൽ ടീമിന്റെ പ്രവർത്തനങ്ങളെ അഭിനന്ദിച്ചു. ഗാസയിലെ വർദ്ധിച്ചുവരുന്ന ആരോഗ്യ ആവശ്യങ്ങൾ പരിഹരിക്കുന്നതിനായി യുഎഇ മിഷനും ഐക്യരാഷ്ട്രസഭയും തമ്മിലുള്ള സഹകരണം കൂടുതൽ ശക്തമാക്കുന്നതിനെക്കുറിച്ച് ഇരുവിഭാഗവും ചർച്ച നടത്തി.