വ്യാജ നിക്ഷേപ പദ്ധതികളിൽ വീഴരുത്; ജാഗ്രതാ നിർദ്ദേശവുമായി യുഎഇ ആഭ്യന്തര മന്ത്രാലയം

അബുദാബി : കുറഞ്ഞ നിക്ഷേപത്തിൽ വലിയ ലാഭവും ഗ്യാരണ്ടീഡ് റിട്ടേണും വാഗ്ദാനം ചെയ്യുന്ന വ്യാജ ഓൺലൈൻ നിക്ഷേപ തട്ടിപ്പുകൾക്കെതിരെ ജനങ്ങൾക്ക് കർശന ജാഗ്രതാ നിർദ്ദേശവുമായി യുഎഇ ആഭ്യന്തര മന്ത്രാലയവും ദുബായ് പൊലീസും രംഗത്തെത്തി. ചുരുങ്ങിയ സമയത്തിനുള്ളിൽ അവിശ്വസനീയമായ ഉയർന്ന വരുമാനം വാഗ്ദാനം ചെയ്യുക, ഉടൻ പണം നിക്ഷേപിക്കാൻ സമ്മർദ്ദം ചെലുത്തുക, ബിസിനസിനെക്കുറിച്ച് വ്യക്തതയില്ലാതിരിക്കുക, വ്യക്തിഗത-ബാങ്കിംഗ് വിവരങ്ങൾ ആവശ്യപ്പെടുക, കമ്പനിയുടെ ലൈസൻസ് വെരിഫൈ ചെയ്യാൻ സാധിക്കാതിരിക്കുക എന്നിവ ഇത്തരം തട്ടിപ്പുകളുടെ പ്രധാന ലക്ഷണങ്ങളാണ്. പണം നഷ്ടപ്പെടുന്നതിനൊപ്പം സ്വകാര്യ വിവരങ്ങൾ ദുരുപയോഗം ചെയ്യപ്പെടാനും ഇത് കാരണമാകുമെന്നതിനാൽ, ഏതൊരു നിക്ഷേപത്തിന് മുൻപും സ്ഥാപനത്തിന്റെ ഔദ്യോഗിക ലൈസൻസ് പരിശോധിക്കണമെന്നും വ്യക്തിഗത അക്കൗണ്ടുകളിലേക്ക് പണം കൈമാറുകയോ ഒടിപി പങ്കുവെക്കുകയോ ചെയ്യരുതെന്നും അധികൃതർ വ്യക്തമാക്കുന്നു.