55-ാമത് ദേശീയ ദിനാഘോഷത്തിലേക്ക് രാജ്യം; കൗണ്ട്ഡൗൺ ആരംഭിച്ചു

അബുദാബി : രാജ്യത്തിന്റെ 55-ാമത് ഈദ് അൽ എത്തിഹാദിന്റെ ഔദ്യോഗിക ദൃശ്യരൂപം (Visual Identity) യുഎഇ പുറത്തിറക്കി. ഡിസംബർ 2-ന് നടക്കുന്ന ദേശീയ ദിനാഘോഷങ്ങളുടെ ഭാഗമായുള്ള 55 ദിവസത്തെ കൗണ്ട്ഡൗണിന് ഇതോടെ തുടക്കമായി.

ഈ വർഷത്തെ ആഘോഷങ്ങൾ യുഎഇയുടെ ‘കുടുംബവർഷത്തിന്റെ’ (Year of Family) പശ്ചാത്തലത്തിലാണ് നടക്കുന്നത്. കഴിഞ്ഞ 55 വർഷമായി രാജ്യത്തെ രൂപപ്പെടുത്തുന്നതിൽ പങ്കുവഹിച്ച കുടുംബങ്ങൾക്കും തലമുറകൾക്കും സമൂഹത്തിനുമാണ് ഈ വർഷം പ്രാധാന്യം നൽകുന്നത്. വ്യത്യസ്ത പശ്ചാത്തലങ്ങളിൽ നിന്നുള്ള ജനങ്ങളെ പൊതുവായ മൂല്യങ്ങളിലൂടെയും അനുഭവങ്ങളിലൂടെയും ഒന്നിപ്പിക്കുന്ന ഒരു ‘കുടുംബങ്ങളുടെ കുടുംബമായി’ (family of families) യുഎഇയെ അവതരിപ്പിക്കുന്നതാണ് ഈ വർഷത്തെ പ്രമേയം.

പരമ്പരാഗത എമിറാത്തി വീടുകൾ, തദ്ദേശീയ വാസ്തുവിദ്യ, സാംസ്കാരിക പാരമ്പര്യങ്ങൾ, രാജ്യത്തിന്റെ പ്രകൃതിഭംഗി എന്നിവയിൽ നിന്നാണ് പുതിയ ദൃശ്യരൂപത്തിനുള്ള പ്രചോദനം ഉൾക്കൊണ്ടിട്ടുള്ളത്. ഒരു കുടുംബത്തിന്റെ ഫോട്ടോ ആൽബം പോലെ, പഴയകാല ആർക്കൈവ് ചിത്രങ്ങളും ആധുനിക ചിത്രങ്ങളും കൂട്ടിച്ചേർത്താണ് ഇത് രൂപകൽപ്പന ചെയ്തിരിക്കുന്നത്. രാജ്യത്ത് ജീവിക്കുകയും ജോലി ചെയ്യുകയും ചെയ്ത ജനങ്ങളിലൂടെ യൂണിയന്റെ കഥ പറയുന്നതോടൊപ്പം, തലമുറകളായി കൈമാറിവന്ന പാരമ്പര്യങ്ങളും മൂല്യങ്ങളും ഇത് ഓർമ്മപ്പെടുത്തുന്നു.

കഴിഞ്ഞ 55 വർഷമായി നമ്മുടെ രാജ്യത്തിന് സവിശേഷത നൽകുന്ന മൂല്യങ്ങളും പാരമ്പര്യങ്ങളും തലമുറകൾ ഏറ്റെടുത്തു നടത്തിയെന്നും, പൊതുവായ ലക്ഷ്യബോധത്താൽ ഒത്തുകൂടിയ കുടുംബങ്ങളുടെ കുടുംബമാണ് യുഎഇ എന്നും 55-ാമത് ഈദ് അൽ എത്തിഹാദ് ടീമിലെ സ്ട്രാറ്റജിക് ആൻഡ് ക്രിയേറ്റീവ് അഫയേഴ്സ് ഡയറക്ടർ ഈസ അൽ സുബൂസി വ്യക്തമാക്കി. ഡിസംബർ 2-ന് മുന്നോടിയായി ആഘോഷങ്ങളിൽ പങ്കാളികളാകാൻ രാജ്യത്തുടനീളമുള്ള കുടുംബങ്ങളെയും സമൂഹങ്ങളെയും അധികൃതർ ആഹ്വാനം ചെയ്തു.