7
ദുബായ് : രാജ്യത്തെ ക്രിമിനൽ നിയമങ്ങളിൽ നിർണ്ണായക മാറ്റവുമായി യുഎഇ. ആത്മഹത്യാശ്രമം ഇനി മുതൽ ക്രിമിനൽ കുറ്റമായി കണക്കാക്കില്ലെന്ന് യുഎഇ സർക്കാർ പ്രഖ്യാപിച്ചു. രാജ്യത്തെ ക്രൈംസ് ആൻഡ് പെനാൽറ്റീസ് നിയമത്തിൽ വരുത്തിയ പുതിയ ഭേദഗതികളുടെ ഭാഗമായാണ് ഈ നടപടി. മാനസികാരോഗ്യ സംരക്ഷണത്തിനും മുൻകരുതലിനും ഊന്നൽ നൽകിക്കൊണ്ടുള്ള മാനുഷിക സമീപനത്തിന്റെ ഭാഗമായാണ് പുതിയ നിയമഭേദഗതിയെന്ന് അധികൃതർ വ്യക്തമാക്കി.
മാനസിക പ്രതിസന്ധികൾ അനുഭവിക്കുന്ന വ്യക്തികൾ നിയമനടപടി ഭയന്ന് ചികിത്സ തേടാൻ മടിക്കുന്നത് ഒഴിവാക്കുകയാണ് ഇതിലൂടെ ലക്ഷ്യമിടുന്നത്. ക്രിമിനൽ പ്രോസിക്യൂഷന് പകരം പ്രതിരോധപരവും ചികിത്സാപരവുമായ സമീപനമായിരിക്കും ഇത്തരം കേസുകളിൽ ഇനി ഉണ്ടാകുക. അതേസമയം, ആത്മഹത്യ ചെയ്യാൻ പ്രേരിപ്പിക്കുന്നവർക്കോ സഹായിക്കുന്നവർക്കോ എതിരെയുള്ള ശിക്ഷാ നടപടികൾ കൂടുതൽ കർശനമാക്കിയിട്ടുണ്ട്. മനുഷ്യജീവിതത്തിന്റെ സംരക്ഷണം ഉറപ്പാക്കുന്നതിനോടൊപ്പം നിയമപരമായ കരുതലും മാനുഷിക പരിഗണനകളും തുലനം ചെയ്യുന്നതാണ് പുതിയ നിയമമെന്ന് സർക്കാർ കൂട്ടിച്ചേർത്തു.